MPCC President Pu Lalsawta leh Vice President Pu Lal Thanzara-te chuan April 1-2, 2022 chhung hian Mamit District an fang a, hruaitu engemawzatin tawiawmin, Mamit, Zawlnuam leh Kawrtethawvengah Vantlang inkhawm buatsaih a nih bakah khaw hrang hranga Congress Party hruaitute chibai an buk a, ram leh hnam tana thawhpui tûr mi thar 37 Pu Lalsawta’n Congress Party-ah a lawmlut bawk a ni.
Vantlang inkhawm hrang hrangah thu sawiin, MPCC President Pu Lalsawta chuan, “Mihring nunah hian thil pawimawh em em a awm a, chu chu kan rilru a ‘danglamna’ hi a ni. Mihring ngai reng hi nasa takin a insiam that theih a, nasa takin a danglam theih. Kan danglam thei ang tih hi ka ring tlat. Pathian zara kan sorkar a nih chuan a hma aia tha zawka tura insiam danglam thei miah lote chu kan mamawh dawn reng reng lo. MLA hlawh duhtawk lote hi Congress-a an awm a ṭul lo. Kan rawngbawl sak mipuite dinhmun hi kan ngaihtuah a ngai. Kan rawngbawl sak mipuite rethei taka an awm laia ram hruaitute lo hausak viau hi a zahthlak. Duham hian awm zia a nei lo a, sum ngah lutuk hi a buaithlak thin. Kum 1995 khan Sukh Rama chu Telecom Minister a ni a, cheng nuai 366 lai a ina a lo dah ṭhat, thuneituten an man sak khan ‘Ka ta a ni lo’ a ti chul mai a ni. Kan pawisa neihte, ‘ka ta a ni lo’ tih ngai khawpa hausa, sum lakluhna hriat si loh kan ni ang tih hi hlauhawm takzet a ni. Mizoramah pawh Sukh Rama anga ka ta a ni lo tih ngai khawpa sum ngah kan awm ve mai thei,” a ti.
Pu Sawta chuan, “March ni 29 zan khan Aijal Club-ah ṭhalai, lehkhathiam tak takte nen inkawm khawmna kan nei a. Ṭhalaite hian chhanchhuaktu an mamawh zia leh an tuihal zia hi a chiang hle a ni. Kan dinhmun hi engpawh nise, keini aia rethei lehchhawng, chhanchhuah tur hi kan ngah tih i hre reng ang u. Pathian hian keini lo chu min thlang dawn lo nia kan hriatna hi kan thawhpui party dangte hi chuan an nei ve lo niin a lang,” a ti bawk.
MPCC Vice President Pu Lal Thanzara pawhin thu sawiin, “Kan ram hruaitu lu ber chu mipuiin an nuih zat a, Kamrula Chhangte hna a vil ngun em em ringawt mai a, a pawi hle a ni. Kan ram politics hi siamṭhat a ngai. Kan Sorkar chhung pawh khan kan lo lal rei deuh a ni ang, kan lo chapo a, paihthlakin kan awm ta a ni. Zoram mipuiten khawngaih takin min ngaidam rawh u. Tunah hian sorkar ngawr ngawr hi kan tum a ni lo a, Sorkar ṭha siam hi kan tum ber a ni. Pu Zoramthanga’n Congress an ding chhuak tawh dawn lo tia a sawi hi a thleng dawn lo, a chhan chu a thusawi thleng dik tak tak a awm ngai loh vang a ni. Mizoram hmun tinah Congress-in harhtharna kan chang mek a, kum 2023 a Sorkar turin a inbuatsaih mek zawk a ni. ZPM te hian kan sorkar dawn ti ve ṭhin mah se Pathianin Mizoram a rorel turin a la thlang ngai lo,” a ti.
Pu Lal Thanzara chuan, “Congress Party-in kan ram leh hnam tan thil tam tak a thawk tawh a, mi retheite hnen thleng phak sorkar a ni ṭhin. Congress Party in kan thutiam kan tihlawhtling lo ngai lo. Remna leh muanna chungchangah pawh kan hotupa Pu Lal Thanhawla’n lal ṭhutthleng ka kian ang tiin mipuiah a intiam a, a CM hnuah a kian mai. Mipui hnena thu tiam a, tih hlawhtlin sak leh si loh hi mipui hmuhsitna a ni. Rangva kan sem ang tiin kan intiam a, kan sem mai. NLUP cheng nuai 1 kan sem ang kan tia, kan sem leh mai. Politics hi kan ram leh hnam inhumhim nan leh hmasawnna tura Pathian min pek a ni a, dawt sawi a thiang lo,” a ti.
Hachhek bialtu MLA Pu Lalrindika Ralte pawhin thu sawiin, “Midang sawisel miah lovin inthlannaah hian a tlin theih. Midang sawisel lo kei ngei pawh MLA ah ka tling. Tunah hian min zui turin kan sawm lo che u a, kan ram leh hnam siam ṭha turin i thawkho ang u, tiin ka sawm zawk che u a ni. Nakumah kan inthlang dawn, MLA pahnih kan bialin kan thlang thei lo, pakhat chiah kan thlang dawn. Kei aia ṭha zawk inhmu a nih chuan ka pawmpui ang che u. Politics ṭha lo leh dawt thu hi kan paih bo a ṭul. Pathianin rawng in bawl sak tawn turin min ti a, mihringte hi hmangaih ngai leh hmangaih beiseitute kan ni. Politics-ah hian hmangaihna nen rawng inbawl sak tawn ila. Bial tana ṭha lo MLA hi ram tan an ṭha thei ngai lo. Pathian rawn chungin kan bialtu MLA hi inthlang a nih a, kei aia ṭha inthlang chhuak a nih chuan ka lawm ngawt ang,” a ti.
April 1, 2022 (Zirtawpni) khan Mamit-ah vantlang inkhawm hi buatsaih a ni a. Vawiin April 2, 2022 hian Zawlnuam-ah leh Kawrtethawvengah buatsaih a ni bawk. Mamit District tlawhnaah hian Pu C. Ngunlianchunga, MLA, Pu John Rotluangliana, Ex Minister, Pu Joseph Lalhimpuia, Ex-MLA leh Congress Party hruaitu mi 40 vel an kal a. MPCC Treasurer Pu Zodintluanga Ralte erawh a bial lama hun a hman mek avangin a tel ve ta lo a ni.
