Aizawl march 29 : Pu VL Zaithanzama, Aizawl West III MLA chuan nimin khan a bial chhung Khatla leh Mission Vengthlang hmun hrang hranga MLA Fund hmanga hnathawhte a tlawh kual a, “MLA hnathawk tha, hnathawh that avanga ram leh bial mipuite fak hlawh MLA nih hi ka tum ber a ni,” a ti.
Aizawl West III bialtu MLA chuan, “Kan sawrkar hrawn tawh leh MLA-ten theih tawp chhuaha hma an lo lak tawhnate a lawmawm takzet a. Chutihlaiin keini chuan a aia tam leh ropui zawkin kan thawk thei tih lantir kan tum a, kan hnathawhah duhtawk lohna leh lawm lohna nei chuan min hrilh ula, chutiang a awm a nih chuan tha zawk leh felfai zawka thawh hi kan huam reng a ni,” a ti a. “Tawngkam thiam leh sawi mam thiam vanga ram hi tha tur a ni lova, dik tak leh theihtawp chhuaha kan thawh phawt chuan he ram hian danglamna a nei ngei ngei ang tih hi kan thu rolum a ni. Sum tam tak a hmanna dik si lo ai chuan, kan hmuh chhun ang dik taka thawh hian hmasawnna a thlen zawk,” a ti bawk.
Aizawl West III MLA hian a bial chhunga MLA Fund hmanga hnathawh tawh leh thawh mekte a hmunah kal chilhin a vil reng a, MLA fund hmanga hnathawhna hmun hrang hrang a tlawhna hi Pi Ramthanzauvi, AMC Ward XIV Councillor leh Party hruaitu ten a tawiawm a ni.
