Aizawl March 31: Pu VL Zaithanzama, Aizawl West – III MLA chuan a bial chhunga MLA Fund hmanga hnathawhte tlawh kualin, hma thar lakna tura veng hrang hrangin ruahmanna an neihte a enpui nghal.
Nimin khan Aizawl West – III bialtu MLA chuan a bial chhung veng thenkhat, Bungkawn Vengthar leh Maubawk-te tlawh kualin MLA Fund hmanga hnathawh zawh tawh leh hma thar lakna tura ruahmanna an siamte a enpui a, “Aizawl khawpui tui tlan ber Tlawng lui pawhtu Vai lui leh Tuikual luite hi khawpui thli luankhawmna an ni a, a thlang lawk atanga kan tui in tur pump chhoh a nih vangin humhalh leh tihfai te an ngai tawh hle a ni. Kan sawrkar hotute pawhin hma an lak ran a ngai a, heng lui humhalh tur hian a bul hnai veng tam tak an inhuamin hmalak pawh an duh hle a ni,” a ti.
MLA chuan a bial chhungah veng a tam avangin development fund atan sanction amount siam tam theih a ni loh thu leh, heti chunga veng tinin an sum hmuh ang angte hmanga tha taka hna an thawk thei chu lawmawm a tih thu a sawi bawk.
