MNF-ah Line-up kan awm ve lo : Lalthlengliana

Mizo Hnam Run chhung inkhawm hun hnihnaah MNF Vice President, Lalthlengliana chuan eptu party-ten MNF chu hotu lawkte zingah line-up awm ang leh, hotute zingah tute pawl emaw awm anga an sawi thin chu thil dangah MNF sawiselna hre si loten, an duh dan dana an phuahchawp mai mai a nih thu a sawi a, a phuahchawptute ngei pawhin a dik lohzia an hria tih a sawi bawk.
MNF-ah chuan ‘pawl pawl leh line-up’ tih vel a awm ve lo a, Pu Zoramthanga kaihhruaina hnuaiah lungrual takin kan kal a, kan kal zel dawn a, dawta min sawi thintute avang hian kan chhiat phah dawn reng reng lo, a ti.
Lalthlengliana chuan MNF chu October ni 22, 1961-ah din a ni a, Mizorama political party-ah Diamond Jubilee lawm thei awm chhun chu MNF party chauh a ni a, political party dang tumah an awm ve lo tiin; Chief Minister zahawm tak Pu Zoramthanga’n nunna thapin fing tak leh huaisen takin min hruai a, Zoram hmasawnna chhiar senloh min thlensak a ni, a ti. Pu Zoramthanga chu hruaitu ropui tak a nih thu sawiin, a hnathawh ropui tam tak zinga langsar zual chu MNF term hmasaah peace bonus atan cheng vbc 180 chuang leh BAFFACOS-ah cheng vaibelchhe tam tak Central-ah a sawi chhuak a. Tun hnaiah Covid hrileng karah pawh budget piah lamah Bamboo Link Road atan cheng 100, Aizawl By-Pass Road atan cheng vbc 500 leh Special Assistance atan cheng vbc 400 a sawi chhuak a ni, a ti bawk.
Zofaten zalenna famkim kan neih theih nan MNF chuan March ni 1, 1966-ah ‘Independence Declaration’ a puang a. Hruaitu hmasaten Zoram an hmangaihna leh Zoramin leirem kan rah ve theihna turin khawvel an daidar nasa hle a. Kum 1970-ah China, 1972-ah West Pakistan, 1975-ah Rome leh Bond an kal thu te, 1978-ah Delhi-ah home arrest-a an awm dan leh mak tak maia January 1979-ah chhanchhuahna ropui tak an tawn thute MNF Vice President chuan a sawi. Zoram mipui duh danin June ni 30, 1986-ah inremna hlu tak kan nei a, inremna kan neih kha sawi bawrhban chi a nih lohzia sawiin, inremna sawisel leh si thintute chu mak a tih thu a sawi bawk.
MNF Vice President chuan MLA term 3 dawn Chief Minister nia Zoram min kaihruaitu Pu Zoramthanga chu social media leh fakselna hrang hrangah archuktuilo ang hialin thil hre chiang lova mi thenkhatin an beih thin thu a sawi.