MNF chuan hruaitu tha kan nei : Dr. Thangtea

MNF party chuan vawiin khan an office Mizo Hnam Runah chhung inkhawm neiin, hun hnihnaah Dr.R.Lalthangliana, MNF Adviser chuan, “MNF thil tum chu Mizote hnama dintu Pathian tih a, Pathian leh kan ram tan tih a ni. A din tirh atangin a hawi zawng leh kal dan mumal tak nei a ni a, kan sakhua leh hnam chawisan a, Zofa ram hrang hranga awmte min phuarkhawm a, pum khata siam hi a ni,” a ti.
MNF Adviser, Dr. R.Lalthangliana chuan, “Mizorama political party dang hruaitute chu an chanchin sawi turin ka hre ve lo a. Mahse, MNF chuan Pu Zoramthanga hruaitu tha kan nei hi kan vannei bik hle a ni. Vanduaithlak takin Pu Denga’n kum1990-ah min boral san hnuah, zu far khat pawh la tem chhin ve lo, tawngtaia Pathian rawn zel mi, leadership nei tha bik Pu Zoramthanga’n min hruai a, a kaihhruaina hi kan ring tawk a ni,” a ti.
Health Minister Dr.R.Lalthangliana chuan, “Kum 3 leh thla 10 kan sorkar chhung hian hripui leng bakah vawk pulh hri, lirnghing, kan unaute raltlan lo dawnsawn leh harsatna tam tak kan tawk a. Health bik chuan Covid do kengkawhin, sorkar department zawng zawng, NGO, Kohhran, mimal leh chhungkua thlengin kan thawhhona tha tak kha Pathianin mal min sawm a ni. Heng harsatnate hi tawng lo i la, kan Chief Minister zahawm tak pawhin tan a la nasa a, thil ropui tak tak a lo thleng tam tawh ngei ang. Hripui leng kha khawvel ram ropui ber leh thil ti thei ber pawh an mualpho nasa a, India ram state tinten harsatna kan tawk a ni. SEDP kan duan lai khan harsatna lo thleng tur hi kan hre lawk si lo a, thenkhatin, ‘an sawi angin an ti leh si lo’ tih hi a awm fo a, kan harsatna tawh kha khawvelin min hriatpui a ni. Hripui loleng tur kha tumahin kan hre lawk lo a, budget-ah hripui leng dona kan dah lo a ni. Heti chung hian CM leh Minister/MLA-ten sawi sen loh tam tak hna kan thawk a ni,” a ti.
Health Minister chuan, “Kan sorkar tirh khan Aizawl Civil Hospital-ah hian ICU 5 chauh awm kha covid hrileng karah 15 kan dah belh nghal a, 10 dang kan dah belh thuai dawn bawk a ni. Kum 2006 kan sorkar laia 5 kan dah kha Congress sorkar kum 10 khan an ring char char a ni. Trauma Centre te, Lung thlaknate hripui lengkarah kan dah bawk,” a ti a. Zemabawka Cancer Specialiy Hospital leh RIPAN-a sum tam tak an sawi chhuah thawh mekte a sawi bawk. MNF chuan sorkar hmasate hmalakna an chhunzawm zel a, District thar fuke kima an tihpuitlin thute a sawi.