Vanlalzawna, Vice President, MNF & Chairman MNF Diamond Jubilee Celebration Committee chuan vawiin khan AIzawl Press Club-ah chanchinthar lakhawmtute kawmin, “Pathian kaihhruaina hnuaiah Mizo National Front (MNF) chuan nikum October 22, 2021 khan kum 60 tlingin, a lawm hawnna hi nikum khan Vanapa Hall-ah ropui takin neih a ni a, kumin kumtluanin Jubilee pual hian hma lak a niin, naktuk october ni 22, 2022 hian a kharna hun, Vanapa Hall ah hman a ni dawn ta a ni,” a ti.
Vanlalzawma chuan, “MNF in kum 60 a tlinna pual hian kan Founder President, Mizo Hnam Pa Pu Laldenga leh midangte, hnam Pasaltha Martarte kan hre reng a, zahna chibai thinlung takin kan buk a ni. Hnam tana thisen leh nunna hlantute hi chawimawina sang ber kan hlan a ni.
“October ni 22, 1961 khan MNF chu Pu Laldenga In Tuikhuahtlangah din a ni a. A dintute kha mi ropui leh mithiam bik ni lovin, mi tlawm te te an ni. Mahse, a dintute kha Pathiana innghat tlat, Mizo hnam thuthlung nghet taka vuantute an ni a. An inghahna pawh SAM 20:7 _Thenkhatin Tawlailir an ring a, thenkhatin Sakawrte an ring a, keini erawh chuan kan Pathian hming kan lam zawk ang_ an ti a. He thu ropui tak hi vawiin thlengin MNF chu a innghahna a la ni reng a. Mizorama Regional Party ding 25 zinga 22 te chu an ral leh mai a, National Party pawh engemawzat rawn ding a, tamtak an ral leh mai thin laiin, MNF in Kum 60na Diamond Jubilee lawm thei a Pathianin tun thlenga min hruaina hi a lawmawm kan ti takzet a. A hnenah lawmthu kan sawi a ni.
“Pu Denga boral hnuin hruaitu ropui tak Pu Zoramthanga kan nei leh a, July 1990 atang khan kum 32 zet, vawiin thlengin min la hruai a. A changin opposition-ah te kan awm leh hnuin vawiinah Zoram kaihruai turin Pathianin MNF hi a ruat a. Party dangte anglo takin MNF chu President thlak ve ngai lo, party hming pawh la thlak ve lo a ni. Tin, kan Party President zahawm tak Pu Zoramthanga hi awmna sawn ve ngailo, chhel tak leh huaisen taka a kaihruai MNF tana ding reng a ni a. Pathian rawn chunga ke pen thin, dawt leh thu dikhlel hmanga midang bei ve ngailo a ni hi kan chhuang takzet a ni,” a ti bawk..
MNF Jubilee pual hian hengte hi buatsaih a ni.
1. MNF dintute chawimawina hlan an ni a, an thlalak mawi taka siamin, Mizo Hnam Runah tar a ni.
2. Diamond Jubilee Logo inziahsiak buatsaih a ni.
3. Jubilee pualin Calendar mawi tak buatsaih a ni.
4. Hnam sipaite leh ramhnuai atanga lo hawte leh lo hmuaktute intawhna hmun Parva chu ‘Remna Kawtchhuah’ hming chawiin, Hriatrengna Lung phun a ni.
5. Independence Puanna hmun Thakthingah Hriatrengna lung phun a ni.
6. Aizawl dai hmun 4ah Jubilee Lung phun a ni. Mizoram hmun hrang hrangah MNF Block hrang hrang hmangin Lung hi phun a ni bawk.
7. MNF Founder Pu Laldenga Hriatrengna lung phun chu cheiṭhat a ni.
8. Laldenga Road (Bawngkawn–Ramhlun-Chanmari) chhinchhiahna chu hmun 4 ah tar thar a ni. UD & PA dept kal tlangin hmun hnihah Road Signage tar a ni bawk.
9. Jubilee pualin Souvenir tha tak buatsaih niin, hmun thenkhatah Hoarding tar a ni.
10. Jubilee T. Shirt mawi tak siam a ni.
