Lalchamliana chuan, MNF hi martarte thisena bualfai kan ni a, kan chhuangin, kan chawimawi a, anni kha kan chakna hnar pawimawh ber an ni fo a, an ni reng dawn a ni. Hruaitu inlungrual, peng kawi ve lo, dinna ngheta ding tlat, hnam rilru in a hruai tlat hruaitu nei kan ni a. An hruaina hnuaiah Pathian leh mipuite duhsakna changin kan sawrkar leh ngei ang a ti.
Vawiin ni 13.10.2022 Ningani-a MNF Hrangturzo Joint Block Conference-ah hian Lalchamliana, Home Minister leh Adviser MNF Gen. Hqrs. ni bawk chuan khuallian niin a hmanpui a. Thusawiin, palai lokal te a lawm thu leh thlengtute inbuatsaihna a fakawm thu a sawi a. Mithar lo lutte lawmna sawiin, MNF chu a hlui leh thar kan thliar ve lova, member zawng zawngte ta a ni, neitu rilru pu apiangte leh thawk peih apiangte tlak tlumna a ni, a ti. Ramri chungchangah October thla Puja zawhah Guahaty ah inbiak leh tur a nih laiin, Assam lamin Nov.ni 2 leh ni 5 inkar remchangah neih an duhthu an rawn sawi a. Hemi hun remchang hi kan hmabak a ni. 2023 Inthlan hmain kum 1 vel hun kan la nei a, sawrkarna siam tawhten term 2 an chelh deuh zel a, a aia rei chelh erawh an la awmlo, kan sawrkar leh ngei ka beisei tlat a.
Tun hma aṭangin kan ramah Regional party lian tak a awm thei lova, Congress a tlahniam viau a, ṭangin, hmasawn se ka duhpui hle mai a, mi-tlo leh principle a ding tlatte hi zui tlak an ni a. Pawl hrang hrang din leh zuang sawn reng chungah mipuiin rinna an ngah a rinawm lova, MNF tluka ding rei, leh kal tluang, keh velo, dinna ngaia ding reng kan ramaah a awmlo. Kum 60 zet tling tawh MNF hi kan hmabak a engin, Party dang hruaitute ang lo takin hruaitu kan inthlak ve chhen lova, nghet taka dingin, hmun danga peng sawn ve miah lo, kan hotupa hruaina hnuaiah lungrual takin kan thawk mek zel tlat a ni. Zirlai pawl leh party dang atangin an hruaitu mitha tak tak lo lut in, kan CM Pu Zoramthanga kaihhruaina ringin lawm takin kan Party-ah rawng an bawl mek a ni. MNF hi kan fel bik em em vang pawh ni lovin, min thlak tu tur ṭhadang an awm hrih miau lo a, chu chu Pathianin mal min sawm lehna tur kawng niin ka hria. Unit leh hruaitu mumal neilo party tan kan ramah tlin a har, a ti bawk.
Pu Chama chuan, Covid avangin kan duh hunah SEDP kan sem thei lova, tunah bul kan han ṭan a, kan la sem chhunzawm zel dawn a ni. Governing Board Cm kaihhruaina leh Executive Board Dy. Cm kaihhruaina hnuaiah chak takin hma lak zel a ni, a ti bawk.
Pu Chama hian Congress leh ZPM leh Neutral aṭangin mithar 399 a lawmlut a ni.
He huna khual zahawm Lalruatkima, Minister leh Adviser, MNF Gen. Hqrs. ni bawk chuan thu sawiin, MNF mipuite hi khawsak harsa tak tak ni mahse, hnam thuthlung vuan tlattu, Lalnu Ropuiliani leh hnam pasaltha tam tak mual liamtawh ten hnam rilru pu a an beih tlatna thinlung put puitute kan ni tlat a. Kan neih tam leh tlemin kan ram leh hnam tana kan inpekna a tidal ngailo, hmasawnna tam tak ram chhunga thleng mek hi chhuan tham a awm a. 2018 hma lama kan rumna, zu zawrh vanga thleng hmeithai leh fahrah namen lova pung te, kan khawsak phung millo tawpa zirna hunbi kalpui te, zirtirtu indaihlohna nasa em em mai te chu theih ang angin chinfel a ni zel mai a. Lirthei chhiah a hlawma kum 15 atan pek lawk ngaite kha mioui phurrit rehna turin tihdanglam a ni ta a, kawng chhe zual hripui len hmaa siamthat te kha lo chhe leh deuh tawh awm mahse, heng te leh siam hmabak te hi kum 3 vel a ral leh chuan a ṭhat theih vek beisei a ni. Ei tur buhfai leh a chhumna Gas pawh kan hnianghnar ta em em mai a ni. Zophaia Sawrkar hmasa hun laia zirlai leh chanchinbu mite thisen chhuak te kha theihnghilh theih a ni tawh lova, vawiinah chuan ram, zirlai leh mipuite chhantu leh hneh let theitu, tawlailir leh sakawrte a innghat ve lo, zoram mipuite ṭawngtaina dawng tlattu, kan Pathian hming lam ṭhin sawrkar kan nei ta a ni. Pathian leh Mipui zarah mithar 399 lo lut tharte nen khan kan sawrkar leh ngei dawn a ni. Tlai ngailo Pathian, min hruai tlattu hian min hruai zel dawn a ni, hnam lunghum vuan tlatin, hnam rilru pu chungin, ‘Pathian leh kan Ram tan’ i ti tlat ang u, a ti.
