Mizoram khawchhak lam khaw hrang hrang tlawh a zin MNYF Vice President leh MNF Campaign Directorate a Secretary Pu Zodinpuia chuan, “kum 2023 December ni 3 a Mizoram inthlanpui neih turah MNF chuan bial 26 ah hnehna a chang dawn tih a lang chiang tawh a, bial dang 14 ah pawh MNF hmasawnna chak takin a thangchho mek a ni”, a ti.
Covid-19 hrilengin a tihbuai loh MNF sawrkar thar hmu turin mipui an insingsa mek niin MNF thalai Vice President chuan a sawi a, ram hmasawnna kawngah chak leh zual a thawk turin mipuite’n MNF ah rinna an nghat lian hle tih sawi in, Mizo mipui beisei leh rinna tihhlawhtling turin MNF pawh a inpeihtawh a ni, a ti bawk.
Pu Zodinpuia chuan, kum 2018 December ni 15 a MNF sawrkar lakluh a nih atangin hripui leng in kum 2 leh a chanve chhung ram hmasawnna hna thawk thei lovin sawrkar a siam a, Covid-19 avang hian Mizoram sum hmuhtur Assembly House a pass thlap tawh cheng Vaibelchhia 3000 dawn kan hmulo a, eptu party ten an sawi uar tak tanpuina kan dawn hi cheng vaibelchhe 70 vel chauh a ni thung, a ti a. Ram mipuite dam khawchhuahna tura ni 718 zet Lockdown neih a ni chung hian MNF sawrkar hnathawh chu Congress sawrkar kum 10 hnathawh nen a inbuktawk hial tawh a, Covid-19 in a tihbuailoh MNF sawrkar hnathawh chu mipuiin an hmuchak a, Mizo mipuite mak tihkhawpin ram hmasawnna hna MNF chuan a thawk chhunzawm leh dawn a ni, a ti.
MNYF Vice President chuan, sawrkar kaltawh leh sawrkar kal mek a chhe thei ang ber a puh a, mipui rilru hruaikawi chu ZPM tum ber niin a sawi a. Heng mite hian thuneihna an chan theihna tur a nih chuan Mizo mipui bum an hreh ngai lo. Kum 2018 khan Val Upa Council an tih te hma ah an MLA candidate zawng zawngte chuan thutiam la in, MLA car thar la lo tur te, MLA hlawhsang la ve lo tur te leh MLA designation plate pawh tar lo turte in an intiam a, heng an intiamna zawng zawng hi an MLA te hian an zawmlo fai vek a ni. ZPM party Leader phei hi chu MLA 40 zinga MLA car thar leina tur dil hmasaber ah a tang nghal a, MLA te hlawh tihpun a tul thu uar taka sawitu leh Designation plate pawh tar hlai ber ber ah ZPM MLA te hi an tang vek a ni, a ti bawk.
Tuna ZPM hruaitu tam berin Pastor Chhawna inlarna changchawi a Ni (sun) a chhuah tur thu an sawina kha a la reilo hle a, tunah chuan Ni eng hliahtu Lukhumparh an sawi mawi leh hle tawh a ni. An MLA te fund hman dan in belhchian a dawllo em em a, Unit din duhlo ang a in sawite hian kum 5 danah mipui bumna tur an zawngkual reng mai a ni, a ti.
MNYF Vice President chuan, Congress party chu Mizoram leh hnam himna tihchhiat pawi tilo leh vai (non-Mizo) ngaisang tura Mizo mipuite fuihtu an ni tiin, kum 2023 MLA inthlan tur aiin kum 2024 a Congress party inthlan chu an thlir ber zawk a ni a ti a, bial hrang hranga candidate an dah dan atangin hei hi a langchiang hle niin a sawi.
Pu Zodinpuia chuan, MNF chu Mizoram leilung nen a inzawmtlat a ni a, Mizo kan nih chuan MNF a awm mai tur kan ni, a ti a. Mizoram hmun hrang hranga MNF hruaitute chu Pathian rinchhan chunga rim taka thawk tur leh, hmeithai, fahrah leh pachhia te ngaihsak a, tanpuitu ni zel turin a chah bawk a ni.
