MNF chuan thuchhuah siamin, “Ṭan bik nei lova Manipura remna leh muanna a awm theihna tura hnathawk tur CRPF ten Mizo Volunteer, mahni khaw venga duty 10 lai an kaphlum hi MNF chuan pawi a ti tak zet a. Mizo pasalṭha hnam chhana nunna chan ta te MNF chuan kan sun tak meuh a, an kal san tak an chhungkua te Pathianin awm pui mawlh rawh se,” an ti.
MNF party chuan “‘Dam leh tlang khatah, thih leh ruam khatah’ tih thu hian Mizo hnam rilru a luah reng angin, MNF chuan kan Pasalthate thihna hi a ngai urhsun takzet a, thinrim thlak a tiin, Central Police Force te chet dan hi demawm a tiin, thliar bik neia Zo hnam chunga an khawsak dan hian kan hnam thinlung a vit thuk hle a ni. Remna leh muanna kawng lam aia buaina tizual tur zawnga an chetna hian India ram tan rah thalo tak a hrin a hlau hle a ni.
“Vawiin hian Hnam Pasalṭha 10-te ruang hi Silchar atangin Lamkaah Mizoram paltlangin lakchhoh a ni dawn a. Hmun hrang hranga ruang lo hmuahna turah a tam thei ang ber MNF-te thawkchhuak turin kan inngen a. An phu ang ngeia zahna leh chawimawina lo hlan turin kan inngen a ni. CYMA in Mizo Hnam aiawha hmuahna hmun Aizawl, Ṭhuampui-a a buatsaih tur hi lawmawm a tiin, kan thlawp tlat a. He hunah hian MNF General Headquarters pawhin zahna alo hlan dawn a ni.
“He Mizo hnam a awm chhung chuan heng martar-te hming hi hriatreng a ni tawh ang a. An hniak hnung zui a, ram leh hnam tana inhlan thar ṭheuh turin Zofa zawng zawngte MNF chuan a sawm a ni,” an ti bawk.
