MPCC chuan thuchhuah a siamah, “Ni 25 March, 2023 a MNYF in ‘LMC awm dawn mahse Lungleiah mipuite’n ni 100 inhlawhna an kalpui zel theih nan MNF sawrkar chuan Budget-ah a dahfel tawh’ tia thuchhuah (C.101/MNYF-HQ/2020-2024/29 Dated Lunglei, the 25th, March,2023) an siam chu thu belhchian dawl lo, dawt a nih zia pawh Kum 2023-2024 Budget Document atanga awlsam taka finfiah mai theih a ni a. Hetianga dawt chiang tak hmanga Lunglei mipuite bum tumna hi anmahni Lunglei mipuite zah lohna leh tham lohna nasa tak a nih avangin March 29, 2023 a LMC inthlanna awm turah MNF candidate zawng zawngte Vote lo ngam turin Congress Party chuan Lunglei mipuite a sawm a ni,” an ti.
Thuchhuahah chuan, “Sorkar kum thar tur, 2023-2024 ah hian Ni 100 inhlawhna (MG-NREGS) atan sorkar laipui (CSS) atangin cheng nuai 11,000 hmuh beisei a ni a, hei hi sorkar kum kal mek 2022-2023 chhunga hmuh tur zat a chhut cheng nuai 22,462 aiin, cheng nuai 11,462 zetin a tlem zawk a ni. Sorkar kum kal mek leh sorkar kum thar tur a Ni 100 inhlawhna atana CSS hmuh beisei zat hi a inthlauh em avangin LMC ding mai tur Lunglei mipuite tan hian Budget-ah engmah an dah lo zawk tih a chiang hle. Ni 100 inhlawhna atana State sorkarin CSS a lo do letna tur State Matching Share (SMS) pawh Budget thar (2023-2024)-ah cheng khat mah dah a ni lo bawk.
“Ni 100 inhlawhna ti a kan hriat, Mahatma Gandhi National Rural Employment Guarantee Scheme (MG-MREGS) hi sorkar laipuia Congress party kaihhruaiin kum 2005 atanga a kalpui kha a ni a. Hemi hmang hian India ram thingtlang bakah, Mizoram chhung thingtlang khaw tam takah vantlang tana rotling (Public Asset) tam tak siam a ni tawh a. COVID-19 hripuiin min nuai hnua thingtlang ei leh bar (rural economy) tinung lehtu pawh Ni 100 inhlawhna hi a ni nghe nghe.
“Hetiang a MNF Thalai-Hqrs ten dawt a nihna finfiah leh mai theih hmanga Lunglei mipuite bum an tum hian MNF hotute rintlak lohzia an lantirnaah Congress party chuan kan ngai a. MNF President leh a thawhpuite hi mi rintlak, dawt sawi ngai lo ni selang chuan an naute hian hetiang belhchian dawl lo thu hi an vawrh darh kher lovang, mahse chhun tur hotute an neih that em avangin finfiah dawl lo hmangin Lunglei mipuite bum an tum tih a chiang hle. Hengte avang hian LMC inthlanna tura MNF candidate-te hi Vote tlak an ni lo tih mipuiten i hria ang u,” tiin an tarlang bawk.
