MNF party chuan thuchhuah siamin, “Mizoramin Medical College kan neih hmasak ber ZMC-ah August ni 7, 2018-ah MBBS zirna bul tan a ni a. Thla 3 hnu lawkah inthlanpui awmin MNF a lo sorkar ta a. He medical College tihhlawhtlinna tura theihtawp chhuah ngar ngartu Dr.R.Lalthangliana , Ex- Health Minister khan a ngai pawimawhin hma a la char char a. A ni bakah kha tih laia he Board-a member leh thawktu hrang hrangte hmalakna avanga MBBS 95 zet kan nei thar hi MNF chuan lawmawm a ti takzet a ni.
“Kan hriat theuh ang Khan MNF sorkar tirh lam kum 2019 kha chuan tluang takin sorkar a kal a. Kum 2020 atanga a hnu kum 2 chhung zet khawvel kha covid-in min nuai a, Mizoram pawh kan bang bik lo. Khang hun harsa karah khan ZMC zirna inpui pawhin nasa takin harsatna a tawk ve a. Dr.R.Lalthangliana, Ex- Health Minister khan he medical College tihhlawhtlinna tur hian chawl miah lovin hma a la a, kha tih laia Health Secretary te, ZMC Director leh thawktu dang zawng zawngte chungah lawmthu MNF chuan a sawi a ni.Sum leh pai harsatna karah Planing, finance, DP & AR leh thawktu dang zawng zawngte chungah lawmthu kan sawi bawk.
“Medical Council of India (MCI) tun hnaia National Medical Council (NMC) ni ta in uluk taka MNF sorkar laia he college an endikna paltlang a, nikum 2023, June ni 16-a recognision (pawmpuina) min pek avanga MBBS zirlai hmasa ber kum 2018-a zir tan ten April ni 30, 2024 a internship paltlang veka Doctor puitling 95 lai kan nei thei a, MNF sorkar hmalakna leh a sulsutu zawng zawng chungah MNF chuan lawmthu a sawi bawk.
“ZMC anih hma State Referral Hospital din phalna hi kum1999-ah planning commission, government of India-in din phalna min pe a, cheng nuai 4000 ruahmanna MNF sorkarin khan a hmu a. State Referral Hospital a nih lai July ni 21, 2005 khan khum 50 awm theihna turin bul tan a ni a.
“Hetianga Doctor puitling 95 zet kan neih takah chuan Hospital hrang hrang CHC/PHC leh Doctor indaihlohna hmunah nasa taka kan harsatna min phuhruk ngei kan beisei bawk.
“Doctor zir chhuak tate pawh hian mipui rawngbawltu an nihna hria a, ram leh mipui tan a tulna hmun a piangah pen chhuak thei turin MNF chuan duhsakna leh beiseina sang tak an lakah a nei a ni.
“ZMC-ah hian tunah leh hun lokal zel turah mamawh tam tak a la nei a. Tuna sorkar thar hian sorkar hmasain a thil lo tih tawhte chhunzawm zel turin MNF chuan a ngenin a beisei bawk a ni,” an ti.
