Vawiin ni 25.07.2025 (Zirtawpni) chawhma dar 11 khan Mizo Hnam Run chhung inkhawm neih a ni a. Hun hnihnaah MLA boral ta, Pu Lalrintluanga Sailo sunna hun hman a ni a. Sunna thu sawiin Pu Vanlalzawma, MNF Vice President, Ex MP(LS) chuan, “Ram leh hnam tana nun chân huama hnam sipaia inpe Pu Lalrintluanga Sailo, MLA kha hnam tan a hlu takzet a. Çhân dawn mah se, hotute thuawih mai thin a ni. Mi inpe, bial tan, ram leh hnam tan leh MNF tana a hun hmangral thaktu a ni a. Entawntur tamtak min hnutchhiah a ni. Inhmuhsitna tawngkam emaw kan tih, Dampa Savawm, tih chu ngaihaw lovin a pawm hmak a, a bial tan leh MNF tan he nihna hi a inhmeh em em a ni. Ram leh hnam tana zalenna suala inpe kan hotute hi an sulhnu kan chhui sak fo a tul hle a ni,” a ti.
Pu TC Pachhunga, Adviser, MNF Gen. Hqrs., Ex MLA pawhin Pu Lalrintluanga Sailo, MLA a ui thu sawiin, “Dampa constituency tana hna a thawh nasatzia a taka hmuhpuitu ka ni a. Hnam thinlungpu mi, mi inpe a ni. He hnam hi chhanchhuah angai a, hnamdangin min chimral mai lohnan zalenna sual a lo ngai a. Hnam rilru pu mi, Pu Rintluanga chuan naupang tein hnam movement a zawm.
Mizote hi Israel fate ang maiin hnamah kan chiang a, Pathian lama kan tan chhung chuan Pathianin min ensan ngailo. Hnam rilru pu tlat ila, Pathianin min tungding leh ang, tiin party mipui kalkhawmte a fuih bawk.
