MNF Ministry leh Pu Robert Romawia Royte hian lung phum ringawt lovin hna thawk rawh se : MPCC

Mizoram Pradesh Congress Committee Media Deptt. chuan vawiin khan MPCC President Lalsawta’n Aizawl East II bial a enkawl laia a hnathawh hrang hrangte an tlawh a, “Aizawl East-II huam chhung veng hrang hrang tana rotling (asset) zawng zawng deuh thaw chu Lalsawta hnathawh a nih zia a takin kan hmu a ni,” an ti.
MPCC chuan, “Pu Lalsawta hian Aizawl East-II a bial chhungin MLA fund piah lamah, veng hrang hrang hall leh Auditorium te, in kal pawhna kawng leh Lei te bakah mipuiin an hman tangkai em em Aizawl Bazar puite pawh sak that a nih theih nan hmalakna thui tak a nei hman a, NEDP sum atangin cheng nuai 3641.59 lai ruahmanin bul tan a ni a, Kum 4 a ral hnuah pawh MNF sorkar hnuaiah a hlawhtlinna hmel hmuh tur ala awm mumal lo. Pu Lalsawta hun laia sak New Market Building tharah tawt takin thilzuartute an inhnawh mek a ni a, hei hi Congress Party chuan pawi a ti tak zet a ni.
“Pu Lalsawta hian Aizawl East-II a bial chhung hian bial chhung a hna tha tak tak a thawh piah lamah, Mizoramin sum dinhmun tha kan neih theih nan, sum leh pai insawhngheh kum (Year of Consolidation) te, Inrenchemna (Austerity measure) nasa taka a kal pui avangtein mi tam takin Finance Minister tha ber a ni an ti hial a. Tuna kan sawrkarin heng kum 3 chhung emaw lek a Ways & Means Advance leh Special Drawing Facility hmang a vawi 184 lai RBI atanga sum an puk tawh ang hi kum 2016 leh 2018 inkarah phei chuan vawikhat mah puk ngai tawh loin Mizoram sum dinhmun a lo siam tha hial tawh a ni. Chutiang taka hnathawk tha Congress Party-in President atana kan nei hi a lawmawm kan ti hle,” an ti bawk.
MPCC Media Deptt.-ten Aizawl East-II bial an tlawh pah hian bialtu MLA leh Sports Minister ni bawk Robert Romawia Royte -in hnathawh a tum, lungphum a phum tawh thenkhatte an en tel bawk a. “MLA inthlan dawna a intiamna te chu a ti hlawhtling tha lo hle a, bial chhung inkalpawhna thenkhat phei chu MLA a nih hnu a khawih danglam la ni miah lo ang mai a zawh tlak loh hialte pawh a awm a ni.
“MNF Ministry chu an kalna apiang a awlsam taka lung phum mai thei, a tak tak a hnathawh hmuh tur awm leh si lo an ni a. An hnathawh tura an sawi tam tak chu Romei zam, kal hnaih a bo leh thin ang mai a beisei bo an ni. Pathian leh Mizoram mipuite zarah Congress Party-in Sawrkarna kan siam leh a nih chuan Tuirial Hydel Project leh Falkawn Referral Hospital kan lo tih hlawhtlin tawh ang bawkin MNF sorkarin lung a phum ve ringawt, tih hlawhtlin ngaihna an hriat lohte hi tihhlawhtlin leh vek kan tum a ni,” an ti bawk.