Mizoram BJP chuan thuchhhuah siamin, “MNF Adviser, Minister Pu Robert Romawia Royte, MADC Election Campaign nei mekin ‘Central Sorkar in Mizoram BJP aiin MNF Sorkar min duhsak zawk’ Saiha Press Conference ah a sawi a. MNF Minister te hian Central sorkar Minister te hmaah NDA an nihna mai piahlama National BJP chhung thuk zawka hnaih an duhthu an sawi thin a. Central Minister Mizoram lo zin reng rengte lo hmuh tumin Lengpui Airport leh an thlenna Raj Bhavan thlengin thlantla hluamin MNF Minister hian a um tuang tuang a, Minister hmu tur Programme a an tel lohna ah pawh Tukverh atang tala hmuhtheih hram a tum thin.
“State dang Assembly Election leh Municipal Election neihah BJP a chak fawr sang tulh tulh a, Kristian Vote tamna Goa leh Manipur ah pawh BJP chiang takin a chak hle. Kum 2024 General Election lo awm tur atan pawh, BJP tan Opposition Party tih tham an awm lo, tih a lang reng
“BJP Mizoram te hi MNF sorkar mekna chhungah hian Opposition Party kan ni a, State sorkar Ministry leh Opposition Party hmalakna a inanglo a, Central Sorkar duhsak zawnga khaikhin chi a ni lo. Karhmasa lawkah CM berin BJP an zawm loh thu leh an thawhpui loh thu a sawi mek lai a, Minister Pu RRR-an CM thusawi dodal zawnga atawng leh hi MNF Ministry kalphung fel loh zia tilang tu leh CM Pu Zoramthanga angaihnep zia tihlanna a ni.
“Pu Robert Romawia’n Mara mipuite rilru tihnual tura LADC leh CADC hmasawnna kal mup mup bik anga dawt phuahchawp a sawi duh pawh hi, a zahtheihloh thlak hle ah kan ngai a, hei hi Mara mipui hmuhsitna a nih bakah a aia Senior Minister Dr K Beichhua mawng hlim mualpho sak a duhna a ni. Pu RRR-a hian Serchhip MLA by-election, Aizawl Local Council Election, Tuirial MLA by-election neiha a intiam (freebies) te tipuitling hmasa phawt rawh se tih chu BJP Mizoram Pradesh chuan kan chah duh a ni.
“CM Pu Zoramthanga leh MNF Party zawng zawngin “Covid 19 vangin hmasawnna engmah a kal thei lo” an ti vek a. Sorkar hnathawk hlawh, GPF, Pension, Tar Pension, Ruihhlo ngaite enkawlna pawisa thlenga pawisa pe thei lo MNF sawrkar hi, Mizo mipuiten kan hmuchiangin, Central sawrkar Scheme, Programme & Project sanction vanga, mipuite chaw la nghei lo mek kan ni zawk a, MNF Sorkarin State mipui Leiba vaibelchhe singkhat leh sanghnih chuang min neihpui tawh hi Mizoram mipui tan manganna a ni.
“CM Pu Zoramthang sorkar leh MNF hotute hian kalzelna kawng an bo a, MADC Election Campaign neih mek ah, hmasawnna thil tih that leh mipui beiseina sawitur an hre lo a, nakum (2023) Mizoram Assembly Election lo awm tur hmachhawn an huphurh a, ze dang khelin BJP chhung luh beiseina vangin PM Modi Sorkar tlawn leh faka, tuna Mizoram BJP hruaitu te dinhmun luahlan tum vangah BJP Mizoram Pradesh chuan kan ngai a ni,” an ti bawk.
