Vawiin ni 15.12.2023 hian Mizo Hnam Runah Exodus Day leh Hnam Run kharna hun hman a ni a. Lawmthu sawina leh sual thuphachawi tawngtai rualna neih a ni a. MNF President Pu Zoramthanga’n thu a sawi a. MLA inthlana MNF Sorkar tlak chhan chu Pathian remruat vang zawk a ni, a ti.
December 16, 1971-ah Dhaka (East Pakistan) atanga hnam pasalthate chhanchhuahna ni ropui chu Exodus Day tih a nih thu sawiin Pu Zoramthanga chuan, “Khami ni (Dec 16) khan Pathianin kan tawngtaina chhang lo se, Pu Denga leh hote kha hmelma kutah kan thi vek ang a, kan hnam movement hi a tawp daih tawh ang,” a ti.
“MNF chu Pathianin chak takin a siam ngai lo. Dinhmun sangah min dah pawhin, min hnuk thla leh thin – kan chapo loh nan,” tiin MNF-in politics kawng a zawh chhoh dan a sawi.
Pu Zoramthanga chuan sorkar kalta chungchang sawiin, “Hripui karah sum harsatna – core fund (non-plan) manganna kan tawk zui a, central atanga kan hmuhntur, lokal lo cheng vbc 3000 vel chu leiba chhipchhuan ang reng ka ni a, nasa taka beih ka tawk a ni. He non-plan indaih lohna hi Centre-in a hnawhkhat dawn lo. He non-plan indaih lohna hi phuhruk a ni ngai lo, peace bonus chiah kha phuhrukna la awm chhun a ni.
“Hei vang hian beih kan tawk a. Development, candidate neih that pawhin awmzia a nei tawh lo. Pathianin kan phurrit min chhawk turin tuna sorkar thar hi a ruat ta a ni,” a ti a. MNF sorkar tla chu Pathiam remruat a ni a ti.
Pu Zoramthanga chuan: “Israel fate history ang deuhin MNF kalkawngah hian Pathian remruatna kan chhiar thiam a ngai. Hei aia harsatna nasa zawk pawh a lo thleng ang. Amaherawhchu, kan hnam thuthlungah hian nghet takin i ding tlat ang u,” tiin party mipuite a sawm a ni.
Dr. R. Lalthangliana, Ex-Minister pawhin he hunah hian thu a sawi a. Hnam martar leh an chhungte bakah sorkar thar leh mipuite chibai a buk a. Khawvela hripui leng leh hun khirh hmachhawn tura Pathianin MNF a dah chu lawmawm a ti a. Tlanchhuahna kawng awm lo atangin Pathianin MNF hnam pasalthate a chhanchhuah dan kha a ropui hle, a ti.
“Overground politics-ah pawh State kan nih (1987) atangin harsatna hrang hrang kan hmachhawn a. Inthlanah kan chak chang a awm. Na taka kan tlak chang a awm. Mahse hun harsaah Pathianin min hruai thin,” a ti a. “Covid kara kan sorkar hmachhawn kha a rapthlak hle a, hripui bakah state dangin an tawrh ve loh buaina chi ruk dangin min tibuai kha a vanduaithlak hle. Mahse Pathian remruat vek a ni,” a ti.
“MNF hi political party a ni mai lo, hnam party – hnam movement kengtu a ni,” a ti a. MNF leader pawh tun dinhmunah chuan MNF tana tha ber a nih thu a sawi a. Dr. Thangtea chuan sorkar anga tihtur a tih tawk lohnaah leh mi thinlung a tihnatnaah thupha a chawi bawk a ni.
Inkhawmah hian Martarte sunna hun hman a ni a. MLA inthlan tluanga neih a nih avangin lawmthu sawina, Sual thuphachawina leh ngaihdam dilna leh Kum 2024 dam taka chuangkai tur leh MNF Party tluang taka a kal theih nan tawngtai rualna hun hman a ni a. Kumthar Hnam Run hawn hun atan January 15, 2024 chu puan a ni bawk.
Exodus Day (Dec 16) leh Hnam Run kharna inkhawm hi MNF Treasurer Pu K. Vanlalauva’n a kaihruai a. Dr. Lalrinzuali, MNF Adviser-in hunserh a hmang a. Pu Lalruatkima, Ex-Minister-in tawngtaina hmangin hun tawp a khar a ni.
