ZPM Thalai chuan vawiin khan an Vice President Zoramchhana Sailo hovin Aizawl Press Club-ah chanchinthar lakhawmtute an kawm a, “MNF sawrkâr hnuaiah sum siamna atâna zirna in sak a ni ṭhin chu ZPM Ṭhalai chuan pawi kan ti a, vawiin 10.7.2023 hian Govt. Mizoram Law College sak mêk chu a hmunah kalin kan en dik a, Law College sak mêk hi ZPM Ṭhalai chuan ni 28.2.2023 khan kan lo en tawh bawk a, hemi ṭum pawh hian an hmanraw hman leh a sak dan a lungawithlak loh hle a, tun thlengin mipuite leh zirlaite tana han lawmna tur thil danglam hmuh tur a la awm chuang lo a ni,” an ti.
Zoramchhana Sailo chuan, “Ni 11.7.2023 hian Mizoram Law College sak mêkah ZPM Ṭhalai chuan punkhawm tawi kan buatsaih a, he punkhawm buatsaih a nih chhan hi Mizorama Law College kan neih chhun ngaihthah a ni hi ZPM Ṭhalai rilru a na a, kan ram ro hlu ber/ kan asset hlu ber ‘zirna’ ngaihthah a ni hi ZPM Ṭhalai chuan pawi a tiin, a duh lo takzet a ni tih lantirna a ni.
“Govt.Mizoram Law College-ah hian college danga an hman duh tawh loh bus hlui ṭawng tak pakhat chiah a awm a, zirlaite’n harsatna tam tak an tawk ṭhin tih hriat chhuah a ni a. Tin, college sak mêl hi May 4, 2020 aṭanga chhiar ṭana thla 20 chhûnga sak zawh tur a nih laiin, tun thlenga a hna chanve takngial pawh zawh a la ni lote, chutih laia Rs nuai 117.96 teh meuh mai a satute hnenah pek chhuah a ni tawh si laite, engineer-in a vil mumal lote hi thil fel lo tak a ni a, ZPM Ṭhalaiin he lai hmun kan tlawh hmasak ṭum pawh hian cement thi tawh hman a nih thu report kan dawng bawk a, ‘Pathian leh kan ram tân,’ titute sawrkârna hnuaia thil thleng atân chuan thil zahthlâk tawpkhawk-ah kan ngai a ni.
“Govt. Mizoram Law College satu Sky Ridge Construction & Consultancy Services hian RUSA 2.0, component 9 : Infrastructure Grants to College hnuaia hna 35 awmah hna 15 zet restricted tender hmangin an thawk a, thil rinhlelhawm tak inphumru a awm ngeiin ZPM Ṭhalai chuan a ring tlat a, he Sky Ridge Construction & Consultancy Services phenah hian a changtu Minister Dr. R.Lalthangliana hian man ṭang a ei ve em ni? tih hi kan zawhna a ni a, a department chanpual hnuaia hna chhe lutukte hi sawifiah thuai turin a changtu minister Dr.R.Lalthangliana kan phut tlat a ni.
“Zirna in sak chungchanga hetiang thil a thleng hi ZPM Ṭhalai chuan a ngai thu tak hle a, zirna pawngsualna-ah kan ngai a, zirna in leh a kaihhnawih sakte ZPM Ṭhalai chuan uluk takin a chhui zui zel dawn a, thil fel lo a awm chuan a mawhphurtute’n hremna na tak an dawn theihna turin na takin hma a la zel dawn a ni. Govt. Mizoram Law College sak mêk hi MNF sawrkârna a tawp hma ngeia ṭha taka sa zo ngei turin MNF sawrkâr kan phut a ni,” tiin an tarlang.
