Congress Thalai chuan thuchhuah siamin, “India sawrkar laipui BJP kaihhruai chu Mizoram sawrkar MNF Pu Zoramthanga kaihhruai lakah an beidawn thu leh an duh khawp an tlin loh thu an puang ta chamchi a. Sum leh paiin rawn vur thin mahse sum an pek zat atanga tehin hmasawnna thar an hmuh loh thu Mizoram tlawhtu Minister apiang ten an sawi ta zel mai hi Congress Thalai chuan vanduaithlak kan ti takzet a, sum enkawl thiam lo an nihzia nitinin a lang ta zel a ni,” a ti.
Thuchhuahah chuan, “Chief Minister Zoramthanga chuan Mizoram Assembly House-ah meuh Jal Sakti Minister Pu Sekawat-a’n sum a rawn pek tum chu a tam lutuk a tih avangin a zat pawh a sawi duh loh hial thu a lo sawi tawh a. Amaherawhchu, Mizoram rawn tlawhtu Jal Shakti Minister Prahlad Singh Patel chuan thuthar thehdarhtute hmaah JJM Mizoram sawrkarin a kalpui danah tui lakna tur pawh enfiah mumal a nih loh thu a sawi leh thung si a. Central sawrkarin Mizoram sum an rawn pek zozai chu eng atana hman nge a nih tih hi Congress Thalai chuan Mizoram sawrkar hi kan zawt a, Mizoram khaw tinah MNF sawrkar hnu hian tui hi kan harsa ta em em a. Mipuite harsatna sukiang turin Central sawrkar hian pawisa rawn sanction thin mahse kan harsatna a zia-awm thei der lo hi pawi kan ti hle a ni.
“Central atanga sum thahnem tak lokal thin hi mahni unaute sum kawlbelhsak atan an paipawn belh zel nge? tih hi Congress Thalaite zawhna a la ni reng a. Tui harsatna sutkianna tur sum lokal pawh hi SEDP sum atan an pawtpeng zawk em ni tih hi sawifiah turin Mizoram sawrkar hi kan phut a ni,” an ti bawk.
