Vawiin June ni 12, 2023 (Thawhtanni) hian Mizo Hnam run chhung inkhawm neih a ni a. Hun hnihnaah Dr. Irene Lalruatkimi, Associate Professor, MZU, MNF Publicity Board member nibawk chuan thusawiin, “MNF sorkar hnuaiah hmasawnna tamtak kan hmu. Mi pangngai chin chuan, Mizoram tih rual hian MNF tih leh kan hotu mual liam tawhte leh damlaite hming hi an hre tel zel a. MNF nih hi Mizoram mai niloin ram dangah pawh a nuam zel. Sum leh paiah direct in sorkar hi chhawr lo mah ila, kawngpui tha min pek te, buhfai leh gas hnianghnara min pek vang ringawt pawh hian sorkar hi kan chhawr a. Mipui tana phurrit tham chhiah la silo a, kan sorkarin min tihsak zozai en hian sorkar chungah hian lawm nachang kan hriat a hun hle a ni, “a ti.
Dr. Irene-i chuan, MZU hi India leh MNF ten Peace Accord an ziah avanga kan neih a ni a. Sawiselna tamtak karah huaisen takin MNF sorkar in Central University ni tura a din a ni a. Tunah chuan Indian Institutional Frame work (IIRF) ranking ah 13 na niin, North East-a University tha ber tih ngam a ni ta hial. Thalaite khawvel thazawk leh hmasawnna thlentu MZU tih kan lam rualin thinlungah MNF tih hi a lang tel lo theilo, a ti.
Technology lamah hmasawnna a thleng chak hle a. Scroll generation tih kan ni ta hial a. Mizorama motor a luhna pawh a la reilo. Tunah chuan Mizoram hmuntin hi hun reilote ah kan thleng zung zung thei tawh a. Kawngtha neih hi hmasawnna tehfung pawimawh tak a ni a. MNF sorkar ah hian he hmasawnna hi mit ngeiin kan hmu a, a takin kan chen nghal a ni. He hmasawnna hmuhhmaih tum talh te leh sorkar kan hrawn tawh te leh MNF sorkar mek sawiseltu te ngei pawh hi a taka chhawr tute an ni.
Agriculture lama kan hmasawnna te hi hmuhhmaih rual a nilo a. Kuthnathawktu mi taima ten a hlawkna an tel mek a. Sorkar hotuten hnathawh that lawmman Delhi tlangah an dawng chamchi mai a ni.
Kan chhehvela harsatna leh buaina avangin, himna zawnga kan unau rawn raltlante, Central sorkarin a remtilo chunga kan lo tuamhlawm a. Zohnahthlak zawng zawngte tan, MNF sorkar hi belhtlak khawpa sorkar puitling leh tha a ni tih hei hian a lantir chiang hle.
Tuna sorkar tluka ramria hma la na ngam kan la nei ngailo. Mi tam takin, MNF hian ramriah hma an la tak tak ngamlo tiin social media ah fiamthu thawh nan an hmang thin a. Amaherawhchu, silai hial hmetpuakin Assam police pawh an in withdraw hial anih kha. Boundary committee hmalakna a thlamuan thlak hle a ni.
Ram ralmuang leh him tehna pakhat, hmeichhia leh naupang himna leh hlimna kawngah pawh Mizoram hi hai ruallohin kan sang a. Mizo chhulchhuak Zofa thlah tamtak nei tur leh Mizo tih chiang taka chhal tur hringchhuak zel tur hmeichhe tam tak an awm mek.
_Rome was not built in a day_, tih angin development zawng zawng hi, tunlai mi thenkhat sawi anga, vawi lehkhata awm thut theih a nilo a. A taka thleng theilo zirtirna hi a himlo. Mahni chauh tha bika inngai, hruaitu hmasate hmalak tawhna hmu duhlo thinte tawpdan hi history atangin i zir thar leh ang u.
Dr. Irene-i chuan, a chhelam ringawt thlir loin, hmasawnna kan hmuhte hi thlir thiam ila, kan thlenchin atanga hmasawn zelin, inthlanpui lo awm turah, Pathian leh kan ram tan titu MNF party hian sorkarna a siam leh ngei theih nan, Zoram mipui zawng zawng ten ke i pen zel ang u, a ti bawk.
Mizo Hnamrun chhung inkhawm hi Pu Lalrammawia, Adviser, Gen. Secretary, MNF Gen. Hqrs chuan kaihruaiin, Pu R. Lalthanmawia, Adviser, MNF Gen. Hqrs chuan hunserh a hmang a. Hmun hrang hrang zin report ngaihthlak a ni bawk.
