Vawiin December ni 9, 2022 hian Congress Party chuan Golden Hall, Congress Bhavan-ah MPCC Friday Political session an nei a. Rev. LR Colney, MPCC Secretary-in a kaihruai a, report hrang hrang ngaihthlak a nih bakah Dr.Lallianchhunga, MPCC Gen.Secy & Spokesperson-in thu a sawi bawk.
MPCC Spokesperson, Dr.Lallianchhunga chuan Congress party leh sakhaw zalenna inzawm dan sawiin, “Congress party a awm a nawmna em em chu Sakhaw Zalenna chawisangtu leh humhim duhtu a nihna hi a ni a, India ramah hian Kristian nih leh Congress party a awm hi a inhmeh hle. Mahse, kum 2014 atanga BJP in sorkar laipuia sorkarna a chan atangin kan Kristian Missionary-ten boruak danglam tak an tawng chho ta zel a, tunah chuan India ram hi khawvelah Kristiante tana ram him lo Top 10-ah a lang chho ta zel a. Tun hma angin India ramah zalen takin kan Missionary-ten hna an thawk thei tawh lo. Congress sorkar kha Kristian Missionary, a Zo a vaiten an thlamuanpui thin. Pu Lal Thanhawla kha Kristian pawl hrang hrangte’n an sawm thin a. Kristian State tia hriat lar, Mizoram State CM berin Kristian pawl hrang hrangte hun buatsaihah a telpui thin avangin Kristian Missionary-te nekchep zawngin BJP phena awm pawlte’n langsar takin hma an la ngam ngai lo a ni. Congress party hian Kristiante tana thlamuanpui tham Sorkar kan lo din tawh a, a chhunzawmtu an awm lo erawh a pawi kan ti hle a ni. MNF sorkar hotute’n India ram Kristian te thlamuanpui tham thil engmah tih an la nei lo hi a mak hle” a ti.
Hmasawnna leh hnam himna chungchang sawiin Dr.Lallianchhunga chuan, “Kan Ram, kan Hnam, kan Sakhua a him loh ai chuan ‘hmasawnna’ kawng nia kan hriatte hi zawh bawrh bawrh loh a him, chuvangin Congress sorkar khan hmasawnna kawng pawh fimkhur takin a zawh thin. Khawvelah sorkar sawisel bo an awm lova, chutiang tho chuan Congress sorkar khan tute emaw sawiselna chu a tawk lo thei bik lo. Mahse, hnama min dintu Pathian hian a tawk te hian ro a rel a. Kan thenawm State-ah hnam ral tawh engemaw zat an awm laiin, Mizorama Mizo te hi hnam anga dingchhuak turin ke kan pen mek a ni. Hmasawnna kan thlen chin pawh hi kan hnam tana him chinah zel a ni” a ti bawk.
MNF sorkar hnuaiah hian hnam anga kan zahawmna kan hloh zel a hlauhawm, tih sawiin Dr.Lallianchhunga chuan, “Congress sorkar pawh kha Central BJP sorkar hnuaiah kum li (2014-2018 ) chhung lai a awm ve tho a; mahse, MNF sorkar ang hian Union Minister te sawiselna leh zilhna a tawk ve lo; Mizoram CM Pu Lal Thanhawla kha an zah em em zawk a ni. Central sorkar hotu, BJP hruaitute khuan MNF sorkar hotute hi an hriatchian em avangin zah tlakah an ngai lo tih a hriat. Central Union Minister te thusawi hi MNF sorkar tan chuan hmaia in ben sawk aiin a na ang. MNF MLA fel tak tak nia kan hriatte pawh Pu Zoramthanga hnuaiah chuan an thatna leh felna ram tan an lantir thei lo. MNF MLA leh Minister fel tak tak nia kan hriatte hian tinge leiba thanga tang mek Mizoram sum leh pai dinhmun hi a chhung atanga siam that an tum loh? A hun taka sorkar hnathawkte’n hlawh an la thei lo hi tinge a chhung atanga an sawisel ngam loh? Healthcare bill an lak theih loh avanga an natna enkawl chhunzawm thei lo chhungkaw tam tak rum thawm hi an hre lo em ni? MNF hotute hi mipuiten zawhna an zawh ve theihna hmun Talk Show-ah pawh an inlan ngam tawh lo” a ti bawk.
Dr. Lallianchhunga chuan, “Hnam anga kan zahawmna humhim tur leh kan Ram, kan Hnam leh kan Sakhua humhim turin a lu ber, Chief Minister a awm tur hi i fimkhur teh ang u” tih sawiin, “Congress party in Mizoram mipuite hnena pek kan duh chu sum leh pai enkawltu rinawm, eirukna lak atanga fihlim chiang sa Pu Lalsawta a ni. Eirukna (corruption) lak atanga fihlim sorkar Mizoram mipuite min dinsak turin political party leader zingah Pu Lalsawta aia tling leh tlak (qualify) an awm lo. Pu Lalsawta hi enchhin chawp ngai ve lo party hruaitu awmchhun a ni. MPCC President ni tura a kawng zawh hi Lalpan atana a buatsaih sak a ni a. Pu Lalsawta hi Pathian hriak thih hruaitu ni lo se, a tan MPCC President a nih ngawt theih loh”
“Mizoram mipuite hian sorkar thianghlim leh hnathawk chak thei tur, hnamdangte lakah pawh sorkar zahawm tak neih an duh. Chutiang sorkar pe theitu tur chu Congress party leh kan President Pu Lalsawta hi an ni. Hnam dangte lakah Mizote zahawmna humhim a ngai. Tuna MNF sorkar hi chuan hnamdangte lakah min mualpho pui zel dawnin a lang. MNF sorkar hi Lal Saula hun hnuhnung ang mai a ni a, a che fuh thei tawh lo,” a ti bawk.
He hunah hian C.Lalrochhara, MPCC EM in Hachhek Tlangdung zin report leh HC Zothanpara MPCC Secretary, in Thorang Bial zin report an pe a. Aizawl West-II Block President Aldrin Zosangliana’n West-II Block report a pek bakah, David Zochhuanmawia MPCC Media Dept member hnen atangin India ram chhunga Congress party dinhmun thar ber report ngaihnawm tak ngaihthlak a ni bawk.
