MNF sorkar-in LADC an pawngsual : LDYCC

Lai District Youth Congress Committee ; Lawngtlai chuan vawiin khan thuchhuah siamin, “MNF Party hian ram hnuai an awm lai atang tawhin Dân leh Dûn te an pawisa ngai lo a. Mipuite hnena an lo sawi thin ‘Chhuah lama kan kal chuan ‘tlak lamah an kal’ lo ti ang che u’ ti thin tute khan LADC ah ro an rel mek a. LADC leh a thawktute zahawmna an ti bawrhbang mek a. Mipuite zah lo takin ro an rel sak mek a ni,” an ti.
Thuchhuahah chuan, “LADC Monsoon Session hmanni lawka neih tak atang khan hetiang tak hian LADC an pawngsual a, an enkawl mipuite an rap bet mek a ni.
“Sorkar hmasa 2015 -2020 chhunga Executive Approval thlapa mimal hnena ram an lo pek tawh chu ‘Executive Approval a awm lo’ tiin mi harsa leh rethei tete an cancelled sak a. Chung an cancelled ram ah te chuan an duhsak zawng leh a ram leilung fa ni lo CADC area a awm te E.M pakhat chhungte hnenah pek leh tho an ni.
“Kan ram Education siam that tumin hma kan” la an ti a. An sorkar hlimah dik lo takin Ngengpuikai Primary School Headmaster Pu Pothi Chindro chu SAMAGRA school LPS Mizoram sorkar school enkawlah an dah mawl tawp a. A hnu lawkah he school a mi Pi Zonunsangi Primary Teacher chu Hmunnuam ah sawn niin, kum khat em pawh a awm hmain SAMAGRA school LPS ah bawk an dah leh tawp a. Hetianga Council service te Council hnuai pawh ni loa an dah ta mai hi Politics a phuba lakna dik tak ah kan ngai a. Heng mite hi Deputation a kal tir an ni bawk si lo a, LADC sorkar Pu V.Zirsanga kaihhruai hian eng dan hmangin nge SAMAGRA hnuaia LPS school Mizoram sorkar enkawl ah hian an dah sawi fiah turin kan phut a ni. Chutih rual chuan hun rei Fixed Pay a lo thawk ve tawh, a hna atanga an han ban ringawtte hi an tenawm kan ti a. Hetianga mi hrawkhrui em pawh chhat duh MNF sorkar hi an tenawm takzet a ni.
“Kan ram leh hnam rorelna Inpui ber a Pu V.Zirsanga’n mahni inthiam lohna pawh nei map lo leh, mipuite zahna nei miah lo a, “Dan leh Dun zawngah chuan thu neitute kan ni a, tha kan tih angin kan rel mai a ni” tia House chhunga a sawi piap piap kha mipuite hnenah thupha chawi turin kan phut a. Hetianga kan ram dan palzuta thu neihna hmang sual CEM leh Politician hi Lairam leh Hnam hian kan mamawh lo a ni tih lo in hria se kan duh a ni.
“Session zawhna leh chhanna atanga a lan danin MNF sorkar MDC leh EM te hian Executive Approval leh Executive Committee Approval pawh hre hrang loa, kan ram min kaihruai ta hi zahthlak kan ti a. Hetiang ang ram hruaitu, Executive Power & Functions pawh hre lo kan hrawn ta hi Laifate kan vanduai takzet a. Thiam lo leh hre lo chung chung chuan MDC leh EM ni lo ngam a, kan ram leh hnam a him zawk nan an nihna bansan turin kan ngen a ni.
“Village Council Members leh an Tlangau ten rambuai hma daih atang tawh a Sorkar in VC te hlutna (prestige) an lo pek ve thin ‘Chhiah âwl’ chu LADC MNF Sorkar hian ‘he chhiah awl’ sum beitham tê awt thlu a mawi leh mawilo pawh dawn lova VC te zahawm ve na an titawp duh mai hi VC te zahawmna rah beh sakna dik tak a ni bawk. A hmaa kalpui anih thin dan ang khan kalpui ni leh rawh se,” an ti bawk.