“MNF Sorkar kalta a CBI hnena Partial Consent an pek leh ZPM Sorkara General Consent an pek hi thil in ang chiah a ni a. Danglamna a awm lo,” Lalnunmawia Chuaungo, MPCC Sr. Vice President chuan a ti.
Vawiin khan Aizawl Press Club-ah Lalnunmawia Chuaungo chuan chanchinthar lakhawmtute kawmin, “July 25, 2024 (Ningani) a Mizoram Peoples’ Forum (MPF) hruaitute hnena kan Chief Minister zahawm tak Pu Lalduhawma’n CBI hnenah ‘ram dan tharin a phut ang thlapin general consent kan pe’ tia, a sawi, News Paper leh Social media a thehdarh chungchangah hian thudik ziktluak lo, Mizoram mipuite rilru hruai sual tumna a awm niin kan hria a. Mizoram mipui ten thudik pumhlum an hriat theih nan tiin Press Conference hi kan nei ta a ni. Chief Minister leh ZPM sawrkar sawisel ngawr ngawr hi kan tum a ni lova, amaherawhchu, mipui ten thudik an hriat theih nana ke pen hi kan tih tur leh mawhphurhna ni-ah kan ngai a ni.
“Kan Chief Ministerin ‘ram dan tharin a phut’ a tih hi Indian Penal Code, 1860 thlaktu Bharatiya Nyaya Sanhita, 2023 niin a lang a. CBI consent pek chungchangah he dan thar hian engmah phut a nei lova, CBI Directorin State tinte hnena lehkha a thawn dungzuia ZPM sawrkarin consent/ remtihna thar an pek July 1, 2024 a Mizoram Gazette Notification a an chhuah ah pawh khan he ‘dan thar’ hi sawi lan a ni miah lo.
“Indian Penal Code, 1860 thlaktu, dan thar, Bharatiya Nyaya Sanhita, 2023 hi July 1, 2024 atanga hman tan a nih tak avanga Section 3 of Delhi Special Police Establishment Act, 1946 hnuaia Notification thar chhuah ngai chu Ministry of Personnel, Public Grievances and Pension, Govt of India, New Delhi chuan June 18, 2024 khan an chhuah fel diam tawh a. State sawrkar tan a thara Notification chhuah a ngai lo. Hei vang hi a ni ngei ang CBI hnena phalna an pek thar July 1, 2024 Gazette Notification ah pawh he dan thar hi sawi lan a ni miah chuang lo.
“CBI hnena phalna (consent) pek chungchangah hian general consent nge a nih partial consent tih aia pawimawh zawk chu ‘Phalna/ Consent pek hian enge a huam’ tih hi a ni.
“Kan Chief Ministerin kum 2023 MLA election campaign lai a CBI hnena ‘general consent’ pek a tiam thin leh sawrkar thar pian hnu a Mizoram Legislative Assembly session hmasa ber neih lai, December 14, 2023 a a sawi .. ‘kan sawrkar kalta ah khan Lokayukta-in CBI hnena pek a rawt pathum lai kan sawrkara thehluh kan sawrkarin a lo dang chat a, pek a phal lo a nih kha. Keini erawh chuan general consent kan pe dawn a, engmah phalna min dil min dil a ngai dawn lo. An kuta thu lut chu an investigate mai dawn a ni’ a tih a general consent a sawi leh tuna general consent kan pe ti si a July 1, 2024 Gazette Notification an chhuah a, ‘Mizoram sawrkar hnuaia public servant te CBI in an chhui hma in State sawrkar phalna ziaka lak hmasak phawt tur a ni,’ an ti leh si hi a in kalhin chhun leh zan ang a. ZPM ten CBI hnena General Consent kan pe an tih leh MNF Sorkar kaltain Partial Consent an pek khan danglamna pakhatmah a nei lo.
Chuvangin, thudik ziktluak lo hmanga mipui rilru kaihhruai tum hi bansan turin kan ngen a ni.
“Mipui ten thudik an hriat theih nan ZPM party a he thila hriatna nei tha ber berte nen mipui hma a sawihona neih tha kan ti a. Chumi atan chuan ZPM hi kan ngenin kan sawm a. Kan sawmna hi an pawm ngei kan beisei a ni,” a ti bawk.
