MPYCC chuan thuchhuah siamin, “Tun hnaiah Myanmar leh Mizoram state pawn atanga ramdang tharchhuah Dawnfawh (Watermelon) chawkluh nasat avangin, Mizoram chhung ngeia kan tharchhuah Dawhfawhte hralhna a hnawng mek a. Hei vang hian Dawnfawh thar hnem Lamzawl khua, Saitual District chuan an Dawhfawh tharchhuah tihralna lamah harsatna an tawk nasa a, suma chan mumal lovin an dah tawih mek a ni,” an ti.
Thuchhuahah chuan, “Tun sorkarah ramdang atanga kuhva lakluh nasat avangin Mizoram chhunga kuhva chingtute ngei pawhin harsatna an tawk tawh a. Hnahlan leh a chhehvela Grape chingtuten Grape thahnem tak thar mah se, a hralh leh thawhchhuah lamah harsatna nasa tak an tawk bawk. Thingtlanga kuthnathawktute intodelh turin nasa takin tang mah se, tun sorkar hian hlawhtlin tuma tang mêkte pawh tanpui thei lova an awm hi a pawi kan ti takzet. Kuthnathawktu tang tak takte pawh an tang hlei thei lo a ni ta ber a ni.
“Dawnfawh hi ramdang atanga lakluh thin ni mah se, Mizoramah a that duh avangin Mizoram hmun hrang hrangah a chin hna hi nasa takin kuthnathawktuten hma an la a. Lamzawl khua bikah phei chuan chhungkaw 30 bawr velin eizawnna tling turin hma an la a ni. An tharchhuah atanga cheng nuai 200 bawr vel man thar thei turah an inngaih laiin, tun dinhmunah Lamzawl khuate hian an Dawhfawh tharte an dah chhe nasa hle a, pum 7000 chuang chu an tichhe tawh a ni.
“Vawiin thlengin Dawnfawh thartute tan hian sorkarin hmalak a neih hriat a ni lo a, June thla laihawl vel thleng a thar vanglai a nih dawn avangin man tlawm tak takin tunah hian a remchang apiangah Dawnfawh hi zawrh a ni ta mek a ni. Kan ramchhung thlai tharte heti taka a hralhna ngaihsak hlawh a ni lo ta zel mai hi thil vanduaithlak tak a ni. Covid-19 hluar laia Serchhip leh Mizoram hmun hrang hranga kuthnathawktute thlai thar hralhna a awm mumal loh avanga manganna te kha ngaihtuahin, kan sorkar hrawn mek hian kuthnathawktu khawsak harsa zawk, thawkrimte a tanpui lo hi a pawi takzet a ni,” an ti bawk.
