“Pathian leh mipui zarah Congress kan sorkar chuan Healthcare hnuaia damlo te MR Bill ba chinfel kan ngaipawimawh ang” : Dr.Lallianchhunga, MPCC Spokesperson
Champhai South bial chhunga Congress party ticket a ding tur Dr. Lallianchhunga, MPCC Spokesperson (Thupuangtu) leh Gen.Secy ni bawk chuan Champhai South bial chhung a khua leh veng hrang hrang a fang zel a. Dr. Lallianchhunga hi Champhai South Block Congress Committee hruaitute, MAHILA, Congress thalai leh Congress mipuite’n an tawiawm thin a ni.
Champhai South bial chhung khua leh veng hrang hrang a fan kualnaah Dr. Lallianchhunga hian Mizoram State Health Care Scheme (MSHCS) chungchanga MNF sorkar hmalakna chhiatzia a hmu chiang hle a. “MNF sorkarin Healthcare Scheme a kalpui danah mipuite’n rinna an hloh chiang hle a. Healthcare Scheme hnuaia inziak lut duh pawh an tlem tawh em em a ni. Congress sorkar hunlai leh MNF sorkar tan tirh lam kha chuan Healthcare Scheme a Mizoram puma inziak lut zat chu chhungkaw nuai chuang te a ni thin a;mahse, damlo MR Bill an batsak rei thin avangin kum kal mekah chuan Mizoram puma Healthcare hnuaia inziak lut zat chu chhungkaw 26,569 chauh a ni tawh. Hei hian mipuiten MNF sorkarin Healthcare a kalpui danah rinna an hloh tawh tih a lan tir chiang hle a ni. Chhungkaw sing chuang te MR bill tlingkhawm cheng nuai 5000 chuang MNF sorkar hian a ba mek a ni” a ti.
MPCC Spokesperson Dr.Lallianchhunga chuan, “Congress sorkar kha ‘A CHHELAI SIAM THATU’ kan ni thin a, Pathian leh mipui zarah tihlawhtling thei dinhmuna kan din phawt chuan Healthcare Scheme tlu chhe mek hi kan siam tha leh ang. Congress sorkar hunlai khan tun ang em em a damlo MR Bill bat sak a awm ngai lova, MNF sorkar hnuaiah chuan damlo MR Bill hmu turin kum 2 dawn te nghah a ngai ta fo mai. Damlo inenkawl chhunzawm duh ten MR Bill an hmuh tlai thin avangin an duh angin an inenkawl chhunzawm thei lo fo bawk; hei hian an hriselna nasa takin a nghawng phah a ni” a ti.
Dr.Lallianchhunga chuan, “Hetianga Mizoram State Health Care Scheme (MSHCS) hnuaia inziaklut damlo ten harsatna an tawhna chhan ber chu Finance Minister leh Chief Minister ni bawk, Pu Zoramthanga’n damlo bill pek a ngaihpawimawh loh vang a ni a. A duhsak zawng Contractor mi tlemte te tan bill lakah harsatna a awm ngai loh laia damlo mi sing chuang te MR Bill tun thlenga MNF sorkarin ala pe thei lo hi mipuite hriselna a ngaihthah vang a ni. Tuna Healthcare bill an pek chhuah chak loh dan atanga chhut chuan kumin 2023 MLA inthlanpui kumah pawh damlo bill te hi an pe chhuak vek hman dawn lo tihna a ni a.RTI chhanna atanga a lan danin Healthcare Scheme tana Asian Development Bank (ADB) atanga loan an puk tur pawh engtikah nge an rawn pek dawn tih hriat theih a ni lo” a ti.
MPCC Spokesperson (Thupuangtu) Dr.Lallianchhunga chuan, “Pu Zoramthanga kaihhruai MNF sorkarah hian mipui vantlang ngaih a fel tak tak Minister leh MLA engemaw zat awm mahse, ‘A CHHELAI SIAM THA TURA’ engmah an sawi ngam thin loh avangin thlan nawn chi an ni tawh lova. Hei hian a lu ber a fim loh chuan a hnuai lam a fim thei chuang lo tih a entir a ni” a ti bawk.
