MNF Sorkarin in Election Manifesto a ti hlawhtling : Lalruatkima

Information Minister leh MNF Adviser ni bawk Lalruatkima chuan MNF sorkar chuan inthlan dawna kan inzawrhna Election Manifesto kan tihlawhtling deuh vek tawh,” a ti a. MNF chu hun harsa lo thleng tur hrelawk vektu Pathianin rintlaka a ngaih, Pathian hriakthih a nih thu a sawi bawk.
Diakkawn YMA Hall, Kolasib-ah Kolasib Block MNF Leadership cum Political Training vawiina neih ah Lalruatkima chuan MNF sorkar hnuah kan kawng a lo tha ta hle a, gas kan hnianghnar em em a, Mualkhang Bottling plant tih zauhna tur pawh ram lei fel a ni leh tawh. Oil depot pawh kan neih thuai theih nan hmalak mek a ni. Lirthei chhiah rit tak ni thin chu mipui tan phurrit lo zawngin siam rem a nih bakah Ni za inhlawhna ah pawh ni za thak thak kan inhlawh thei a ni a ti.
MNF Adviser Sorkar hmasa hunlaiin Zophaiah Assam police-in kan zirlaite silaiin min kap a. Zoram kan tap a ni. Khatih hunlai khan kan zirlaite chhantu leh chhan ngam sorkar kan nei lo. Pathian leh mipui zarah sorkar-na MNF-in a lo chang a, thil a inthlak nasa ta hle mai. Ram neitu sorkarah chuan Police te an huaisen ta a ni. Zoram chuan a neitu dik tak chhantu a nei ta a ni tih kan hriat vek kha a ti a. Ram neitute sorkarah mipuite kan him a, kan thla a muang a ni a ti. I&PR Minister chuan, tun hma lamin Union bugget-ah Mizoram hming a la chuang ngai lova, chaw min fun khep ngai lo. Pu Zorama sorkarah erawh chuan vaibelchhe 600 lai mai min fun kep ta te hi a ropui tak zet a ni a ti bawk.
He hun hmanpuitu dang Supply Minister K Lalrinliana pawhin thusawiin, Ramri buai te, hripui avanga manganna te, Myanmar buai avanga raltlan tam tak lo lut te, vawk pul hri nasa tak te kan ramin a tawk a. He hun khirh taka rorel tura Pathianin min dah hi, kan tlin bik vang a ni hauh lo tih sawiin Assam-in national highway kha chen an dan pin khan kan CM hmalakna a ropui ka ti hle. Foreign ram dang dawr turin hma a la nghal a, ram dang dawr turin ruahmanna siam niin a hlawhtlinna pawh kan hmu hman hial. Ram dang dawra hma kan lakna hi an ngai ngam lo a, chu chu kawng dan an tih tawp chhan kha niin ka hria.Pathian duh dan ang ngeia he ram hi kan hruai a ngai a ni. Mipuite hmangaihna leh dawh theihna nen hma lam kan pan zel a ngai a ni a ti bawk.