Mizo Hnam Runah chhung inkhawm vawiina neihah Lalchamliana, MNF Adviser, Home Minister ni bawk chuan thu a sawi.
Lalchamliana chuan, MNF sorkarin kohhran leh mipui duhdana zu a khap hnuah zu vanga thi Police an tlem tih a sawi. Damdawi ruihhlo do tura CYMA in Central Anti Drugs Squad an din hi ?ha ka ti a, kan thlawp theuh a pawimawh a ni a ti. Zoram mipuiten kan awmna hmun theuhah CADS hmalakna hi tawiawm ang u, tiin ngenna siam bawk.
MNF Adviser chuan tun dinhmunah Mizoramah party pangngai pathum, inthlannaa in la lian thei an awm tih sawiin – MNF, ZPM, Congress an ni. BJP thlengin an hotute hi MNF party chhul chhuak vek an ni. Engatinge MNF an chhuahsana pawl danga an awm? Policy leh thildang a awm lo. Leadership an chan loh vanga pawl danga awm, pawl din chawp an ni. ZPM hi party a hotu nihna chan loh vanga chhuak an ni. MNF aia inti nationalist a, leader chan loh vanga pawl din an ni. An pawl base hi ZNP vek an ni. Tunhnaiah Pu Thena naute ho PC lam hmin tumin tawngkam thlum nen a bei leh mek tih sawin, Sabengtung sakeibaknei vuna inthuam, Sihalin ‘a hram hi lo hre fo tawh lo ila chuan kei pawhin ka hlau ang mawle!’ a tih kha a ni.
An kalphung thar hi enge hria in awm em? An kalphung thar ber nia ka hriat chu VUC hi a ni. Anni pawh hian a tul an ti lo niang! Hlawhpung lak loh tur, an tia, a duh hmasa sa an ni a. Keini chuan a sema sem kan ti dawn lo an ti a.. Mahse, ZPM MLA in tuizem a sem, puanthui khawl a sem an ti leh tho si. India rama kan awm chhung hian sorkar laipuiin a duanbak piah lam kalphung thar hi Independent state kan nih loh chuan tih theih a nih ka ring lo, a ti.
Congress pawh central thlenga hruaitu mumal nei thei lo an ni a, an khawngaihthlak letling a ni. ‘That loh theih lohna bawm hi hmu in awm tawh em? Lut an la awm lo a ni awm e’ a ti bawk.
Lalchamliana chuan, Assam sorkar nen ramri chungchanga Gauhati-a Assam nen a inbiakna chungchang a sawi a, Assam nena kan ramri chungchangah hian Boundary Committee in a duhdan ang zelin kan kal dawn a ni a ti.
Home Minister chuan zawhna lian tak awm mek chu, ‘Mizoramin kan hauh mek 1875 Innerline forest area hi kan duh ang ngeiin Assam hian min pe ta sela. Assembly Constituency panga (5) rinluh a ngai dawn a, kan duh tak tak ang em?’ tih hi zawhna lian tak, opinion poll lak hialna awm a nih thu sawiin, mi thenkhatin ‘kan umchhuak vek anga ni mai lawm’ an ti ngawt a. Tunlai khawvelah chutiangin a chet theih tawh loh tih hi kan hriat tlan atha a ni, a ti.
