MPCC chuan, “Kum 2018 December thla a MNF sorkar a pian hnuah Mizoramah rorelna fel hmuh tur a awm lo a, danin ngaihpawimawh a hlawh hek lo. MNF sorkar hnuaiah Dan ang taka rorelna (rule of law) a bo zo a, Mizoram dinhmun a chhe takzet ta a ni,” an ti.
Nimina thuchhuah an siamah MPCC chuan, “Tunhnaia Mizoram tlawhtu, Union Minister of State John Barla chuan Ministry of Minority Affairs hnuaiah cheng vaibelchhe 1000 chuang Mizoram sorkar hnenah pek a ni tawh a, mahse, Mizoram sorkarin sum hman dan report (Utilisation Certificate) pek tur a nei lo tih thu a sawi a. Union Minister of State, Food Processing Industries leh Jal Shakti enkawltu Prahlad Singh Patel pawhin cheng vaibelchhe 75 senga siam Kolasib District a Mega Food Park-in a rilru a tih nat thu a sawi bawk. Heng zawng zawng hi MNF tih chingpen vek a ni. State Referral Hospital, Falkawn leh Tuirial Hydel Project ang bawkin an sawpchhe zo leh mai ang tih hlauhawm tak a ni.
“Lunglei Zohnuai a Science Centre sak mek, cheng nuai 65 senna tur, PWD-in an thawh mek chu CM leh an bialtu MLA duh dan angin civil mi Pu HS Laltlanzara, Zotlang, Lunglei chu Work Supervisor atan ruat a ni bawk a. Hei hi sorkar kalphung kalh tlat niin, MNF sorkarin dan an zah loh zia leh sorkar hnathawkte an rin loh zia tilang chiangtu a ni bawk.
“MNF sorkar hnuaiah hian dan lo a hnathawh, dan lo a hnathawktu lak leh dan bawhchhiatna chi hrang hrang a hluar em em a. MNF sorkar hnuaiah Smuggler-te an zalen mai a ni lo a, MNF hruaitu lawk tak takin an thlavang an hauh zawk emaw tih tur a ni a. Tin, Drugs a hluarin, Mizo thalai tam tak Drugs hmansual vangin an thi mek a, chhungkaw tam tak mangang takin kan rum mek a ni.
Sum leh pai enkawlna chungchangah MNF sorkar a hlawhchham let der a. Sum leh pai hman dan fel lo lutuk avangin Mizoram chu Leiba Thang (Debt Trap)-ah a tang chho mek a, sorkar hnathawkte hlawh leh pension pawisa te, healthcare bill thlengin pek theih a ni lo a. Hetiang taka sum leh pai enkawlna a hlawhchham sorkar hi Mizoramah a la awm ngai lo bawk.
“MNF sorkar kal dan en hian Mizoram siamthat tum aiin tihchhiat vek an tum emaw tih mai tur a ni a. Hetiang taka sorkar tha lo hi Mizoramah a la awm ngai lo. MNF sorkarah MLA tha tak tak, mi thiam tak takte awm bawk mah se, CM Pu Zoramthanga leh a chekawiten che thei miah lovin an siam a, MLA tha tak takte zingah MLA a din zui phur loh phah an awm nual bawk.
“MNF sorkarna hnuaiah Mizoram dinhmunin chhiat lam a pan zel a, dinhmun chhe lehzuala kan luh loh nan a rang thei ang bera MNF sorkar hi paihthlak an ngai a ni,” an ti bawk.
