Vawiin chhun dar 12:00 khan MNF Senior Vice President, Dr.R.Lalthangliana chuan MINECO hmuna Sinlung Hills District Council (SHDC) Office chu tlawhin, Executive Member-te nen inkawm hona hun tha tak an nei.
Dr.R.Lalthangliana chuan, tun tum SHDC inthlan khan kan party atangin bial thenkhatah MNF official candidate-te an din thuah hlawm a, chuti chungin ZPM sorkar hlim vanglai takin hnehna sang tak an chang kha lawmawm a tih thu a sawi nawn a, din thuahtu awm lo se chuan ZPM ho kha an tlin ve mumal a rin loh thu a sawi.
Dr.Thangtea chuan, “Tun tum Budget Session khan Demand number 15 naah SHDC budget cheng nuai 701.34 kha a ni a. In budget hi a bei tham si a, budget piah lam thil sawi hova hmalak chu thil tul tak a ni,” a ti.
Dr.Thangtea chuan, “Tun tum in budget-ah hian Civil works atan cheng nuai 150/- an dah hi bial 12 a hnathawhna tur chuan a tlem hle a. CADC, MADC, LADC ahte pawh hnathawkna tur sum a tlem thin hle a. Helai tak hi ngaihtuahna sen lai ngai tak chu a ni,” a ti bawk.
“Mizoram sorkara budget awm sa hi kan hriat theuh angin a hun leh hma chu han tihpun dan a awm tawh lo a. Nakkum budget lo awm tur pawh khi an sual vang ni lovin a pun tam vak ka ring lo, a chhan chu, anmahni tawngkam avangin central lamah an tlatlum si lo a. ZPM sorkar hian chet ngaihna an hre vak lo ang,” Dr.Thangtea chuan a ti.
Hmasawn tur chuan SHDC membet-te hian bial chhung theuhah thil pawimawh tihtur bik en thiam a, DPR siam thiam leh bawhzui thiam a pawimawh thu a sawi bawk.
Dr.Thangtea hian MNF General Headquarters aiawhin SHDC area-a mipui zawng zawngte hnenah MNF party ticket a dingte thlan tlin an nih avangin lawmthu a sawi nawn leh a ni.
MNF Senior Vice President hi SHDC CEM Ricky Lalremsanga leh SHDC Executive Member-ten an lo dawngsawng a. Member-ten inhmelhriattirna leh hmasawnna tura an vei zawng hrang hrangte an sawiho a ni.
