Mizo National Youth Front(MNYF) Headquarters chuan October ni 27, 2002 (Ningani) zan khan IIT, Kharagpur aṭanga Computer Science & Engineering-a Doctorate Degree hmu thar F. Lalchhandama s/o FC Lalrinawma, Siaha chu a chenna Mission Vengthlangah lawmpuina hun neiin, chawimawina thuziak leh pangpar an hlan a ni.
He lawmpuina inkhawm hi MNYF Vice President Pu Zodinpuia chuan a kaihruai a. He huna thusawitu MNYF President Pu L. Thangmawia chuan “Dr. F. Lalchhandama hlawhtlinna hi Mizo ṭhalaite’n kan lawmpuiin kan chhuang hle a, University of Texas, St. Antonio, USA-in Post Doctoral fellow atana an thlang leh zelte hi a ropui kan ti a, a kal zelna turah duhsakna hlan chungin a thiam leh finna te kan ram leh hnam tana hmang zel turin kan ngen nghal a ni” a ti.
MNYF President chuan Dr. F.Lalchhandama hi Mizoram chhunga zirna In hrang hrang – Siaha khua-a Govt. Beula P/S, Children Training School, Elim Public School leh Greenland HSS, Aizawl aṭanga zirchhuak a nih thu a sawi a. “Mizoram chhunga zirna In hrang hrang aṭanga zirchhuak tho zirlai panga – Simon Lalremsiama, Shangpliang (IIT-Guwahati), Gabriel Vanlalbera (IIT-Bhubaneswar), Lalchhanhima (IIT-Dhanbad), Vanlalmuanpuia (IIT-IIT-Madras) leh Malsawmzuala Khiangte (IIT-Bhubaneswar) te’n kumin 2022-a IIT-a lut tura entrance test hautak tak an paltlang hi Mizo ṭhalaite’n kan lawmpuiin kan chhuang hle a, hlawhtling taka zirchhuak turin duhsakna kan hlan a ni” tiin “Mizoram zirna hi India ram mai ni lo, khawvel level-ah pawh a chhe bik lo tih heng zirlai chhuanawm tak tak te’n an rawn ti lang a. Mizoram Sorkara zirna lam thawktu zawng zawngte pawh kan lawmpui a, heng an hlawhtlinna hi Mizo zirlai ten chona a ngaia an hniakhnung kan zui a ngai a ni” a ti bawk.
Pu Thangmawia chuan IIT-te hi India Sorkarin a bik taka khawvel ram dang zirna êl pha tura a duan an nih thu leh IIT chhuakte hi khawvel ram hrang hrang leh USA-ah te hna duhawm leh ṭha tak tak thawk an awm ṭeuh tawh thu a sawi a. “Zofate zingah zirna kawng hrang hrangah mithiam awm nual tawh mah ila, India ram leh khawvel ang pawha mithiam bik kan la tam tawk lo hle a, zirlaite’n degree pangngai leh Sorkar hna zawn nan mai ni lo, mahni line-a thiam filawr bik leh state dang leh Sorkar dangin an rawn tlak ni thei tura kan rilru kan buatsaih a hun tawh takzet a ni”a ti bawk.
Dr. F. Lalchhandama pawhin thusawiin MNF ṭhalaite’n zirna ngai pawimawha a hlawhtlinna an lawmpui chu lawmawm a tih thu a sawi a, “Mizo ṭhalai tam zawkte hi IIT-ah lut thei se ka duh hle a, IIT-ah chuan zirna atana facilities leh resource-te an ṭha em em vek a. Mizote thluak hi a ṭha em em a, vai hovin Middle school an kal lai aṭanga IIT-a lut tura an inbuatsaih tawh ṭhin laiin keini ah chuan class XII kan zawh hnuah kan tum tlai khaw hnu leh ṭhin a, chuti chung chuan kan la el pha tho a ni” a ti a, MNF ṭhalaite’n zirna kawnga mi chhuanawmte ngaihhlutna chang an hre ṭhin chu lawmawm a tih thu sawiin hetiang kawnga MNF ṭhalaite’n an hmalakna chhunzawm zel turin a ngen bawk.
