Dated Aizawl, the 14th November, 2022: MPYCC chuan thuchhuah siamin, “MNF Thalaiten thuchhuah siama Mizoram hmasawnna thlentuah Pu Zoramthanga an ngai hi thudik lo a ni tih Congress Thalai chuan kan hriattir a, an pute tlawn nan maia thuchhuah siam tawh lo tur leh thu belhchian dawl chauh chhuah thin tawh turin kan chah a ni,” an ti.
Thuchhuahah chuan, “Mizoram hmasawnna ruhrel lian leh pawimawh, vawiina ramin innghah nana a hman mek te hi Congress sawrkar kutchhuak deuh vek zawk a ni a. Tuirial HEP chu thluaka sum lutte avanga hluihlawn anih tawh hnuah Congress sawrkar chuan harsatna tam tak paltlangin a dinthar leh a. Vawiinah chuan tangkai takin ram mipuiten kan hmang mek a ni. Tin, damdawi in lian leh Doctor zirna mai ni lo, research hial zirna tur khawp Falkawn ami chu MNF Pu Zoramthanga kaihhruai chuan ar vulhna tawk lekah sum atchilhna avangin a chhuah a. Congress sawrkar bawkin Medical College leh damdawi in lian leh changtlung takah a din chho leh a. Chuti chung chuan zak map lovin a hming pawh Pu Zoramthanga hming chawi ni ngeia ngaih theihin Zoram Medical College tiin an thlak leh te hi a zahtheihlohthlak hle a. Hmasawnna ruhrel dang zawng zawng pawh hi din anih chho dante hi zirchiang hmasa vek tawh turin MNF thalaite chu kan chah a ni.
“Tunhnaia Ministry of Transport & Highways-in India Hmarchhak state hrang hrangte tana kawngpui thar sialna tur project a duan tharah Mizoram state tana sum dah cheng 6664 crore chu MNF Thalaite hian Pu Zoramthanga hmalakna vang nia an sawi hi Congress Thalai chuan nuihzatthlak kan ti hle a. An sawi anga Pu Zoramthanga hmalakna anih chuan India Hmarchhak state dang Arunachal Pradesh cheng 44,000 crore te, Assam cheng 38,000 crore te, Manipur cheng 15,499 crore te, Meghalaya 12,500 crore te, Tripura cheng 12,426 crore te hi Mizoram state aia hmu tam an ni a. Mizoram CM hian heng state CM te hi a tluk lo hle dawn tih hi anmahni leh anmahni mipui hriatah an in puang zawk mai a ni,” an ti a.
“Ramin hun harsa kan tawh laia Pa nih tlinga MNF Thalaite hian an Pu ber an sawite phei hi chu Mizo mipuite hian mak an tih hle Congress Thalai chuan kan ring a. Covid 19 hripui kan tawrh lai khan khawnge Pu Zoramthanga hi a awm? tih hi Congress Thalai zawhna a ni a. Mizo mipuite tanrualna – mi tlawmngai leh mi inphalte sum thawhkhawm bakah Kohhran leh khawtlang inpekna avang chauha kha hripui kha tuar chhuak kan ni tih hi kan ngaihdan a la ni reng a. Indian Council of Medical Research (ICMR) phalna anga District tinah RTPCR covid test na khawl pawh dah theihna hun remchang awmah engtin maha hma la lo chu CM Pu Zoramthanga hi a ni. MLA tlawmngai thenkhat tena RTPCR pek an tum pawh hma la duh lo leh hawisan tlattu a nihzia kha mipuiten an la theihnghilh lova. Chumai ni lovin, thahanemngai taka hmalatu Health Minister chu hna a thawh mek laiin an sum chevel audit tirtu kha Finance Minister, CM ni bawk kha a ni tih hi tumahin an hai lo ni,” an ti bawk.
