Vawiin 22nd October 2022, MNF Diamond Jubilee kharna hun hman pualin Mizo National Youth Front (MNYF) hruaitute chuan MNF dintute zinga la dam awm chhun C.Hermana, Mission Veng chu a chenna Inah zahna chibai bukin, MNF Diamond Jubilee pualin MNYF President L.Thangmawia MLA chuan Jubili T-shirt leh Pu Zoramthanga, Signatories-in a a lehkhabu ziak “Zoram Zalen nan hming ka sign” tih bu chu a hlan nghal a ni.
He hunah hian MNYF President L.Thangmawia chuan, “Kan hnam leh sakhua humhim a nih theihna tura MNF lo dinchhuaktute chu MNF ṭhalaite chuan an ngaihlu hle a ni, a ti. MNF chu kum 61-a upa ni tawh mahse ṭhangtharte’n a hlutna an la rawn hre dawn chauh a ni, a ti bawk.
MNF dintute zinga la dam awm chhun Pu C.Hermana pawhin, MNF an din chhoh lai khan kum 24 mi chauh a la nih thu a sawi a. Tunah chuan kum upa lam a nih tawh avangin che chhuak tam thei tawh lo mahse, MNF hruaitute’n hun pawimawha an rawn hre reng ṭhin chu lawmawm a tih thu MNYF hruaitute hi a lo hrilh a ni.
Kum 1961 October ni 22-ah MNF hi Pu Laldenga In, Tuikhuahtlangah din a ni a. Mizoramin zalenna sang ber neia Zofate rorelna pakhat hnuaia kan awm theihna turte, Kristian sakhua humhalh tlat turte leh Mizo hnam tih hmasawn leh chawisante hi MNF tum bulpui leh a din chhan pathumte an ni.
