MNYF Vice President Zodinpuia chuan Aizawl Press Clubah vawiin khan chanchinthar lakhawmtute kawmin, “Tunhnai ah Mizoram pawn hmun hrang hrang aṭangin MNF President leh Chief Minister Pu Zoramthanga chuan beih atawk nasa hle a. Hetianga beihna liantak a tawhna chhan hi Manipur state-a remna leh muanna a awm theihna tura ke a pen avang leh, kan unaute thlavang hauhna kawng a hma nasa taka a lak vang a ni. Nimin July ni 26 khan Manipur khawpui Imphal ah Meitei nu ho leh an thalai pawl (Meira Paibis, Arambai Tenggol, Meitei Leepun-ni ngei a hriat) te chuan Chief Minister Pu Zoramthanga lim leh thlalak hi hmun hrang hrangah hal in, nasa takin an diriam a. July ni 25 (Thawhlehni) pawh khan Manipur University chhunga Meitei zirlaite chuan Chief Minister lim hi an lo hal tawh bawk a ni. Hei mai bakah hian, June ni 7 khan All Assam Manipuri Youth Association hmalaknain Assam state hmun hrang hrangah Pu Zoramthanga lim hi hal a ni a, All Assam Manipuri Youth Association (AAMYA) phei hi chuan MNF-in Manipur-a kan unaute inrelbawlna hran (separate administration) a thlawp chu duh lovin, June ni 14,2023 (Nilaini) aṭanga chhiar a, ni 3 chhunga MNF-in Manipur Zohnahthlakte inrelbawlna hran a thlawp chu a hnukkir lo a nih chuan harsatna lianzawk Mizoramin a hmachhawn theih thu leh, Mizoram leh Assam inkalpawhna kawngpui danchah an tum thu an lo sawi hial tawh a ni,” a ti.
Zodinpuia chuan, “Kan chipui leh kan unaute tawrhna chu kan tawrhna a ni a, an tan ka theihtawp ka chhuahzel dawn”, titu MNF President leh Chief Minister Pu Zoramthanga’n a mite a hmangaih avanga a tawrhna hi MNYF chuan ropui a tiin a chhuang tak zet a, Zofate min kaihruai tura chakna a neihzel theihnan Zoram mipuite pawh ṭawngṭaina lama lo hre reng turin kan ngen tak meuh che u a ni.
“Kumin 2023,January ni 30 a MNF Legislature party meeting neih chuan, ‘UCC Mizoram sawrkarin a duhloh thu leh a dodalna hi Mizoram Assembly House ah pass-a nih theihnan hmalak ni rawh se”, a ti a. He hmalakna bawhzui hian kumin Assembly session, February 14, 2023 a neih takah khan UCC kan duhloh thu Mizoram rorelna In sangber ah pass a lo ni tawh a. MNF President Pu Zoramthanga chuan July ni 4 khan Law Commission of India hnenah UCC hi India ram puma hman a duhloh thu ziakin a lo thlen tawh bawk a ni. Hei bakah hian MNF Adviser pahnih (2) Pu C.Lalrosanga, Lok Sabha MP leh Pu K.Vanlalvena Rajya Sabha MP te chuan UCC hi nasa takin an dodal mek a ni.
“Mizoram a political party hrang hrang zingah UCC duhlohna thu hi a thlenna tur hmun diktak Law Commission of India hnena thlen awmchhun chu MNF chauh hi niin kan la hria a, election dawn hnaih a vung rawn chhuah ṭhin, rawng leh kalphung mumal pawh neilo, eptu party pakhatin UCC chungchanga hmalakna mumal neilo ang hial a MNF an rawn bei ve ngawt mai kha ram leh hnam vei na tak tak an neihloh zia mipui hma a an rawnin puanna ah MNYF chuan a ngai a ni.
“Mizoram hi Pathianin Zofate Jerusalem ni tura a din a ni a, Zohnahthlak rorelna pakhat hnuaia kan awm leh theihnan hnama min dintu chuan kawng min ruahmansak mek a ni. Kum tamtak chhung ralthuam leh sipai chakna hmanga rawt chimih tuma beih tâwk tawh MNF hi Pathianin vawiin thlengin a la humhim a, Zofate’n zalenna famkim kan neih hma loh chuan zalenna meichher kengtu la ni zel dawn a ni,” a ti bawk.
