Vawiin khan MNF Thalai chuan thuchhuah siamin, “ZPM General Headquarters-in 22nd October 2022 (Inrinni) a Dampa East Block Political Training an hmanpuina ah, Pu Zoramthanga kaihhruai MNF Sorkar an sawi chhan tih hriat taka, ‘Aizawl by-pass road atan Vaibelchhe 500 leh Bamboo link road atan budget-ah vaibelchhe 100 an dah theih chuan keini pawhin budget-ah vaibelchhe 1000 kan dah thei’ ti a ZPM General Headquarters hruaitute’n an party mipui kal khawmte hma a an sawi hi MNYF Headquarters’ chuan nuihzathlak a tiin; Mizoram mipui bum tumna leh Budget kalphung hre lo zawk ZPM mipuite thudik chanve hmanga bual ât an tumna ah a ngai a. Thudik tawk lo hmanga ZPM-in mipui rilru lak pen an tum thinna hi sim tawh turin MNYF Headquarters’ chuan thurawn a pe a ni,” an ti.
Thuchhuahah chuan, “Kum 2022, February ni 1-a Union Finance Minister-in Sorkar kum 2022-2023 atana budget a pharh takah khan India hmarchhak State pariat te a bika enkawlna tur Prime Minister’s Development Initiative for Northeast (PM-DevINE) chu ruahmanna a rawn siam a. He ruahmanna ah hian hmarchhak State pariat-te tan Vaibelchhe 1500 dah niin ; heng zinga Vaibelchhe 600 zet chu Mizoram tana ruahman a ni. Sorkar laipuiin hmarchhak state pariatte hmasawnna tura ruahmanna a siamah hian state dangte thik tham khawpin Mizoram chuan Chief Minister Pu Zoramthanga hmalakna avangin a chang tam lawrlak a, hmarchhak state pariat-te tana sum ruahman Vbc 1500 a\ang hian Za-a Sawmli (40%) zet chu Mizoram chan a ni.
“Aizawl khawpui chhung Traffic jam tih ziaawmna tur project, ‘Aizawl By-pass Road’ cheng Vaibelchhe 500 zet senna tur leh Loneitute’n an huan leh lo awlsam zawka an pana kuthnathawktute’n an thlai thar awlsam zawka an phurhchhuah theihna tur ‘Bamboo Link Road’ siamna atan Vaibelchhe 100 zet chu PM-DevINE hnuaiah hian dah a ni. Mizoram tana hmasawnna ruhrel lian siamna tur project pahnihte hi Prime Minister kaihhruai Union Cabinet Meeting pawhin pawmpui tawhin, Mizoram budget a?anga sum chengkhat mah sen belh ngai lo 100% central funding turin a pawm a ni.
“Sorkar laipui budget-ah Mizoram tana hmasawnna lian tham siamna tur cheng Vbc 600 zet mai State mal hminga dah a ni hi Union Territory (UT) leh State kan nih hnuah pawh Mizoramin a la tawn ngai loh a ni a. Hetiang khawpa tam Mizoram hmasawnna sual chhuaktu Chief Minister Pu Zoramthanga hi MNF thalaite chuan ropui kan tiin kan chhuang tak zet a ni.
“Hetihlaia ZPM-in Aizawl by-pass road leh Bamboo Link Road siamna tur, mipuite’n Mizoram budget atanga dah hran emaw an tih theih tura thudik famkim tawk lo an aupui reng mai hi MNYF chuan pawi a ti tak zet a. Union budget leh Mizoram budget lo zirchiang ve tawh turin MNF ?halaite chuan thurawn kan pe a ni. Tin, Union budget leh State budget hre hrang lo ZPM-in ram kaihruai tura tling bera an inngai hi mipui nuih an ti za hle a ni tih pawh lo inhre tel turin kan duh bawk a ni.
“Dawt leh thudik lo hmanga hamthatna chan tum ZPM hruaitute hian zui tlak an nih loh zia an rawn inpuang chho zelah MNYF chuan a ngai a. Mizoram hmasawnna tura tih tak zeta hnathawk thin hruaitu rinawm leh zui tlak nei MNF-a rawn inchhun luh hi ZPM hmabak leh tho tur a nih avangin Dâr nawn hma ngeia MNF-a rawn lut turin MNYF Headquarters’ chuan a sawm nghal a ni,” an ti bawk.
