Vawiin October ni 14 (Zirtawpni) hian MNYF Headquarters’ hruaitu tharte chuan Mizoram Journalist Association (MJA) office tlawhin MJA member-te nen inkawmhona hun ṭha tak an nei.
He hunah hian MNYF President L.Thangmawia MLA chuan MJA-te nen inkawmhona hun ṭha tak an nei thei chu lawmawm a tih thu sawiin, mipui tana thuthar thehdarhtute thawhrimna leh inpekna chu chhuanawm a tih thu a sawi a. MNF hruaitute’n an chungah rinna nghata ṭhalai kaihhruaina kawngah mawhphurhna an pek chu ṭha taka an hlen chhuah theih nan MJA member-te thawh ho puiah a sawm bawk a ni.
He hunah hian MJA Treasurer C. Lalhmachhuana pawhin thusawiin, MNYF Headquarters hruaitu tharte’n thuthar thehdarhtute hmalakna ngai pawimawha MJA office an rawn tlawh chu lawmawm a tih thu a sawi a. MJA member-te chuan mipuite hnena thuthar dik leh rintlak thehdarh hi kan tih tur anih avangin pawl ṭan bik kan neih a thianglo a, mipui tana hriat tur ṭul leh pawimawh an neihte erawh inthlahrunglo a puanzar hna rawn thawkzel turin MNYF hruaitute chu a sawm a ni.
He huna thusawitu dang MNYF Vice President Zodinpuia chuan, MJA member-te nen thawhhona ṭhatak an nei leh thei tur chu lawmawm a tih thu sawiin, ram mipuite hmasawnna tura sorkar-in hma a lakna hrang hrangah MJA in sorkar a ṭawiawm tlat ṭhin chu lawmawm a tih thu a sawi bawk a ni.
MNYF President Pu L.Thangmawia MLA chuan MJA ten a ṭul apianga an hman turin sumfai ṭhehnem tak MJA Treasurer kutah a hlan nghal a ni.
