Vawiin Mizo Hnam run chhung inkhawm hun hnihnaah Pu C. Lalrosanga, MP Lok Sabha chuan thu a sawi a. “MP te hian palai hna kan thawk ber a- Mizoram sorkar leh sorkar laipui inkarah te, mipui leh Minister inkarah te kan thawk a ni ber. Covid vangin kum 2 leh a chanve dâwn kan buai a, sorkar laipui pawh an buai tho a. Covid dona kawngah MP Fund min cut saka, hlawh min cut sak bawk a. MP mal mah ni ila kan zam bik hauh lova, kan tih theih ang chinah kan tlanchhe lo a ni.
“Assam Rifle sawn chhuah chungchang hi Mizo mipuite rilruah a tla nâ hlawm hle a, Parliament-ah te ka auchhuahpui bawk a. Union Home Minister Pu Amit Shah pawh nikum kumtawp lam khan ka hmu a, Assam Rifle sawn chhuah chungchang chauh ka sawipui a ni. Home Secretary ah te kan nawr zel a. Tun hnaiah kan Deputy Chief Minister Pu Tawnluia chu Delhi-ah a lo kal a. Assam Rifle sawn chhuah chungchanga inrawnkhawmna Aizawla nei turin hotute a rawn be pawp thei ta a. AR sawn chhuah kawngah Hmasawnna hmel a lo lang ṭan zel dâwn a ni.
“Myanmar lam aṭanga raltlan lo lut, kan unaute thlavang hauh kawngah kan CM leh Minister te an ṭang na em em a. Keini pawh Parliament ah kan ṭan nat ngam phah a ni. Kan unau Raltlan lo lutte tan theihtawp kan chhuah mek a. Ṭanpuina pe tur pawhin Sorkar laipui kan dawr kual zel a. CM hmalakna zarah Sorkar laipui pawh raltlan chhawmdawl kawngah an hmin chho mek a ni” a ti.
Mizoram Sorkar hotu hrang hrangten, Delhi lama hna bawhzui ngai an neih kawngah amah chu pur hreh lo turin MP chuan a ngen bawk. Mizoram tan theihtawp chhuah a inhuam reng tih hriatsak turin a chah bawk.
Central Sector hnuaiah Mizoramah hmasawnna hna nasa tak thawh a ni mek a. Kawngpui ṭha zawk sial mek a ni te hi Mizoram tan hmasawnna hnukpui tur a la ni dâwn a. Sorkar laipui ruahmanna in Bairabi thleng Rel kawng lian kan nei thuai dawn a ni. Central Sector lam chi reng rengah company lian emaw sorkar laipui company ten an tihtur ang ang ṭha taka an tihhlawhtlin ngei theih nan theihtawp a chhuah zel thu a sawi bawk.
MP Pu Rosanga chuan Parliament a auchhuahpui tura duh nei an awm chuan engtik lai pawhin an rawtna te a hnena thlen turin a ngen bawk.
