Ronald Sapa Tlau, Ex MP & Chief Spokesman, MPCC nibawk chuan vawiin khan Aizawl Press Club-ah chanchinthar lakhawmtute kawmin, “AIR News, in a puan danin Delhi BJP Hqrs chuan Mizoram inthlannaah BJP chu a sawrkar lamah an tang dawn”, tih an puang thawr mai a. Tin, BJP National President JP Nadda chuan Oct 27, ‘23 khan MNF Sawrkar SEDP hnuaia eirukna tam lutuk chu an Sawrkar chuan chhuitir an tum tih leh an Financial mismanagement chu chhui an tum thu a puang bawk a ni, a ti.
Ronald Sapa Tlau chuan, “MNF ve thungin tuntum Delhi lam BJP chuan MNF chu hmelma doa an rawn do tak mai thu an puang ve thung a. Mizoram politic zirmiten, ‘BJP Party chuan a tam berah Mizoram Assembly seat 6 bak an hmu lo ang,’ an lo tih mek laia hetia BJP in an candidate 1 Dy. CM a nih tur thu an puan hmak ngam atang hian thil 2 chiang taka kawh a nei awm e :
(1) Tun hnaia an rawn beih mawlh mawlh tak Party (MNF) ni lo, Regional Party dang thawhpui atana biak rem an nei tawh a niang tih leh,
(2) An biak fel Party chuan CM Post an chanin an lungawi ani tih leh Dy. CM post pekchhuah pawh an lungawi ani tihte hi a ni a.
“BJP Partner tur atan, tun dinhmunah hian MNF ni lo, thawhpui theiha an neih dang chu ZPM chauh an ni hrih si a. Chutih laia kan ram, hnam leh sakhua min tihchhiat sak vek tum mek tu, BJP an la sawichhe hauh lo te hian mipui mak tih a hlawh hle mai a.
“Hetia BJP in an thawhpui tur an rawn tiualau ta mai hian mipui mak tih a hlawh hle mai a. An thawhpui tur an rawn tarlan te tan phei chuan an tawmna buka Atomb Bomb rawn thlak ang hialah an ngaih pawhin a mak miah lo ang le. Modi-a Mamita a rawn zin chuan an thawhpui turte tan hlawkna aiin chhiatna lam a thlen an hlauh vanga lokal lo tura zuk ngen an awm a nih hi rin a ni a.
“Tuntum kan inthlang tur chu a boruak a dangdai hle a. Tuten emaw hidden agenda-a an lo neih khiau kha khulama an Partner te fimkhur tawk loh vang nge ni, open agenda alo ni ta mai chu a nia. Hetiang a nih takah chuan Zoram Mipui rilu a insiam ta sung sung mai niin thil chikmite chuan an sawi.
“Hetiang boruak hnuaia inthlang tur kan nih lai hian CM atana zawrh 3, Pu Zoramthanga, Pu Lalduhoma & Pu Lalsawta te kan nei a. An 3 hian an zahawmin, chawimawi phu thah an niin ka hria a. Mimala kan huat vang emaw, Party dangte beihna emaw niloin, mipuiin kan thlan turte hi kan belh chian zawk theih nan heng Point pawimawhte hi lo tarlang zuai ila:
a) Kan Cm nilai hi Zopa nelawm tak, Kristianna ngaipawimawh tak, mi invawng fel, thusawi leh a thutiam tam tak umpha miah lo a ni a.
b) Pu Duhoma pa chhuanawm, pa thluak tha leh thusawi thiam, kohhran Upa ni phak hial, leh mi rilru hmin thei tak a ni a. Amarawh chu rei tak a lo tlangaupui tawh, DAH chu a sawi ngai ta lo a. Tin, Zoram kuthnathawktute nghahhlelh, sawhthing KG 1 ah Rs 50 a lei alo tiam fo tawh chu, Oct 23, ’23 a interview naah sawifiah ngai a nih thu leh, leitu tur an zawn sak tur thu te sawiin, an Sawrkarin lei a tum loh thu a puang ta mai khan Farmer-te a barakhaihin, an rilru a tihel hle a. Hei hian an Party pawh a nghawng hle nitea sawi pawh an awm a.
Tin, CM a nih chuan Portfolio a chang lo ang tia alo sawi thin chu he interview naah vek hian Portfolio tlem a zawng a chan tur thuin mipui a rawn barakhaih leh a. Congress ho chu pawisa sema a puh reng laiin a Hand holding policy ngeiah pawh suma tanpuina an pek tur thu a rawn puang leh ta a. Hengte hian kan lo hmuhphak loh thil tam tak min ngaihtuah thui tir hle ta mai a.
c) Pu Lalsawta hi erawh chu, thusawi thiama sawi phak loh, lem chan thiam hauh lo, ni chu ni, ni lo chu ni lo, thutiam a ding nghet tlat, mithiam chungchuang, Sawrkar kaihhruaina lam experience nei tha em em, a hrechiang a piangin ram hruaitu atana an awh a ni a. Congress Party Manifesto a puan te hi a vaia tihhlaawhtlin tum tlat a ni a. Heti taka kan sum dinhmun a chhiat tawh lai leh kan ram leh hnam leh Sakhuanain chhantu a ngaih em em lai hian Pu Lalsawta hi Mizoram kaihruai tura thlang turin mipuite ka ngen che u a ni e,” a ti bawk.
