Vawiin khan MPCC chuan nimin lama boralta an vice president Ronald Sapa Tlau ruang hmuahna hun Lengpuiah an hmang a, Capt N Vanlalringa Chaplain, Airport chuan inkhawm kaihruaiin, MPCC Treasurer Dr. Lalmalsawma Nghaka chuan party aiawhin a ruang chungah pangpar a dah a ni.
Party aiawh a thusawitu MPCC Sr. Vice president chuan “Vawiinah kan tum leh kan duh dan ni hauh lovin Pu Ronald Sapa Tlau ruang la turin kan rawn kal a. Mizoram mipui aiawh a Parliament ah kum ruk lai thu tawh a ni a, Mizoram tan thil ropui tak tak a ni tawh tih mi tamtak in nimin amah sunna hun kan buatsaih ah leh social media leh media hrang hragah a lo lang a, chu chuan a hnathawh ropui zia a tarlang a ni.
“Kan beisei dan chuan hlawhtling takin an zai anga, tha takin ram leh pathian rawng kan bawl ho leh ang chu kan tih laiin kan beisei loh angin thil a lo kal ta hi a pawi kan ti takmeuh a ni.
“Ram rawngbawl tura Congress party a min sawmtu a ni mai lova, Congress party a lut tura min sawmtu a ni a. Nau anga min en a, thurawn tha tak tak min pe tu a ni a, a mimal takin ka tan pawh hian channa nasa tak a ni. Kan party tan phei chuan channa nasa tak a ni a, a hmun ruak hi hnawhkhah theih a ni dawn lo a ni.
“Pu Ronald sapa Tlau boral hi kan sun a, kan ui takmeuh a ni. A thihna ah hian a chhungte tan Pathian thlamuanna kan dilpui a, kan party tan pawh malsawma thlentu lo ni se kan ti a, kan tawngtaina a ni,” a ti.
