Commonwealth Games 2022, Birmingham-a neih mekah India ram aiawhtu Mizo tlangval Jeremy Lalrinnunga’n Weightlifting 67 kg ah Gold medal a la chu Congress Party chuan lawmawm a tiin a chhuang takzet tih an sawi.
MPCC chuan, “Jeremy Lalrinnunga’n Gold Medal a hlawh chhuah theihna tura theihtawp chhuahpuitu India sorkar leh an Coach-te chungah MPCC chuan lawmthu a sawi a. Hetih rual hian a bul tanna atana Catch Them Young Policy hmanga kawng sah kuak saktu, a hunlaia Sports Minister Pu Zodintluanga te, Sports Council hotute leh hlawhtlinna ropui tak a chan theihna atana amah tanpuitu zawng zawngten chawimawi an phu takzet a ni.
“Sports lama theihna bik nei naupangte dawmkanna tur Catch Them Young Policy hi Congress sorkar lai khan Pu Zodintluanga Ralte, Sports Minister ho a kalpui a ni a. Sports discipline hrang hrangah naupang, infiamna lama talent nei thate zawnchhuah hna leh dawmkan hna nasa taka thawh a ni. He Policy hlawhtlinna hi sports discipline hrang hrangah hmuh tur tam tak a awm a, tuna Commonwealth Games-a Gold Medal la ta Jeremy Lalrinnunga pawh hi Catch Them Young Policy hnuaia hmuhchhuah, kum 2011-a Army Sports Institute a zir tura thawn, harsatna tam tak kara dingchhuak ta a ni. Hetianga hlawhtlinna ropui tak a chang ta hi Congress Party chuan kan chhuangin, kan lawmpui em em a ni.
“Mizoramah hian Sports lama talent nei tha tak tak naupang engemawzat an awm reng a. An talent haichhuah a, tuaihriam hi awmze nei a sports tihhmasawn nan chuan a tul takzet a ni, chu chu Catch Them Young Policy-in a tum ber a ni bawk,” an ti.
