MPCC chuan thuchhuah siamin, “June 18, 2023 a Council of Ministers thukhawm (meeting) chuan Ainawn veng (Gov’t Complex veng tia hriat thin) a sorkar building/quarters te chu chhiatrupna thleng thei pumpelh nan building te tihruah a, thiah nghal nise tiin thutlukna a siam a. He thuchhuak bawhzui hian June 22, 2023 khan General Administration Department (GAD) chuan Ainawn venga sorkar Quarters Type I, II, III leh IV luahtu chhungkaw za chuang te chu ni 60 chhung ngeia an chenna In chhuahsan turin Vacation Order (Memo No.D.11014/1/2022-GAD (GM) Dated Aizawl, the 22nd June,2023) khauh tak a chhuah a. He thuchhuak hian chhungkaw tam tak tana manganna a thlen avangin MNF sorkar hian ngaihtuah nawn leh se tih hi Congress party duh dan a ni a. Quarter luahtu chhungkaw harsa tak tak te dinhmun hre rengin tun aia awmze nei zawka hmalakna nei turin Congress party chuan MNF sorkar kan ngen a ni.
“Sorkar lehkha atanga a lan danin Ainawn venga sorkar Quarters luah mektute hi chhungkaw 161 vel an ni a. Heng chhungkua te hian hmun dangah chenna In an neih loh avangin an theih ang angin an sum leh pai sengin an Quarters luahte hi an siamtha (repair) ve thin a. Sorkar phalna thlapa luahtute chuan thlatin sorkarah House Rent Allowance (HRA) an chawi thin bawk.
“Mizoram sorkar thupek khauh tak avang hian Ainawn venga sorkar quarters luahtu chhungkaw za chuang te chuan ni 60 chhung ngeiin chenna tur hmun dang an zawn a ngai dawn a. Kum tam tak chhung an lo chen tawhna veng atanga hnawhchhuah an ni mai tur hi an tan a manganthlak tak meuh a. Veng dangah pawh In luah tur a van mai bakah, an hlawh atanga an luah phak tawk In pawh hmuh harsa tak tur a ni a. Chhungkaw tam tak chu sorkar thuchhuak avang hian lungngaiin an kun tlawk tlawk mek a ni.
“Heng sorkar Quarters chhungkaw luah laite hi a theih ang anga chei tha turin Congress party chuan MNF sorkar kan phut a. Chenna atana a him lo tih chhuanlama a luahtute dinhmun leh rilru tur hriatthiampui duh lova chhuah tir tum rum rum hi a nunrawn thlak takzet a. Heng sorkar quarters te hi chenna atana him lo a nih pawhin a tahtawlin siam that hna sorkarin a sum neih dan milin a thawk mai turah kan ngai a. Sorkar quarters te hi sak that a nih pawhin sak zawh a nih hunah tuna luahtute hian anmahni puala In an la nei lo a nih chuan Ainawn venga sorkar quarters tharte an luah leh ngei theih nan sorkarin intiamkamna siam se kan ti bawk. Tunlaia inluah tur van em em laia ni tlemte chauh hun inpek a, inhnawhchhuah tum hi a Mizo lova, a Kristian lo hle bawk a ni,” tiin an tarlang.
