Congress Party chuan thuchhuah siamin, “Deputy Chief Minister hmalaknaa Lunglei Municipal Council (LMC) inthlan atana inbuatsaihna thui tak a kal tawh lai leh political party te pawhin LMC sorkar siam ngei tuma theihtawp an chhuah mek laiin, ruling party atanga inthlan tikhawtlai zawnga hmalakna chak tak a awm hi Congress party chuan pawi a ti a. Deputy CM in a sawi ang ngeiin kumin chhung ngeia Lunglei Municipal Council Election hi buatsaih turin Congress Party chuan MNF Sorkar hi a ngen nghal bawk a ni,” an ti.
Thuchhuahah chuan, “May ni 12, 2022 (Ningani) khan Deputy Chief Minister Pu Tawnluia chuan kumin 2022 chhung ngeia Lunglei Municipal Council inthlan hi buatsaih a nih tur thu alo sawi tawh a. Lunglei Municipal Council inthlanna tura Final Electoral Roll pawh October ni 14, 2022 (Zirtawpni) khan thlangzarh tawh niin, he inthlan inbuatsaihna atan pawh Mizoram Sorkarin State Election Commission (SEC) hnenah September ni 13, 2022 (Thawhlehni) khan sum leh pai pawh a hlan fel vek tawh a; LMC Chief Executive Officer (CEO) leh Secretary tur pawh August ni 2,2022 (Thawhlehni) khan ruat an ni tawh bawk.
“Hetianga sorkar a inbuatsaih mek lai leh Deputy Chief Minister pawhin LMC hi din ngei a duh laiin Lunglei MNF Sub-headquarters hotute nawrna avangin thulh a ni dawn niin a lang a. Sorkarin inthlanna a buatsaih lohna chhan nia a sawi Lunglei Municipal Council Office peih fel a la ni lo tia chhuanlam an siam hi thu tling lo a ni a, LMC Office tur hi an peih fel vek tawh zawk a ni.
“MNF Party chhunga hruaitute inmil lohna avangte, Lunglei, Siaha leh Lawngtlai panna kawngpui chhe lutuk te hi LMC inthlan an buatsaih ngam loh chhan a ni zawk em tih MNF sorkar hi kan zawt a. Hengte hi an chhuanlam a nih loh chuan Lunglei Municipal Council hi a nih dan tur dik tak a din a nih theih nana inthlan hi buatsaih thuai turin Congress Party chuan MNF Sorkar a ngen a ni,” an ti bawk.
