“Ṭang Puihna hmangin he ram hi mi taima te leh thawkrimte hlawhtlinna ramah kan siam dawn.. ṭan nachang hre lo te pawh ṭang turin kan zirtirin, kan fuihin kan kaihruai ang. Taksa leh rilru lama harsatna nei te, ṭang tura beisei theih loh te erawh an harsatna ngaihtuahpuiin, damdawi leh inenkawlna bakah an fate zirna thlenga buaipui sak an ni ang” – Lalsawta MPCC President
Darlawn tlangdunga zin kual mek MPCC President Lalsawta chuan vawiin ni 15th September, 2022 hian BRC Hall, Darlawn ah Congress Party Workers’ Meet a hmanpui.
He hunah hian MPCC President Lalsawta chuan thusawiin, “Khawvel ram hrang hrangte hian neih inang kan neih chu ram leh mipui hi a ni a, ram leh mipui enkawlna hi ram roreltute mawhphurhna lian ber a ni. Ram hruaitu a zirin ram a changkangin a hausa thei a. A enkawltu an dik loh chuan ram mipuite tan retheihna leh manganna thlentu an ni thin. North Korea leh South Korea ram dinhmun kan thlir a, ram hruaitu nei ṭha leh ṭha lo dinhmun inthlauhna a lang chiang hle a ni,” a ti.
Finance Minister hlui Lalsawta chuan Ṭang Puihna chungchang sawiin, “Lo neitu, kuthnathawkte leh ṭhalai eizawnna kawnga puih ngaite tan, Ṭang Puihna an mamawh ang zelin kan pe dawn a. He ram hi mi taima leh thawkrimte hlawhtlinna ramah kan siam dawn. Ṭangte kan pui ang a, ṭan nachang hre lo te pawh ṭang tura zirtirin kan fuih ang a, kan kaihruai ang. Taksa leh rilru lama harsatna nei te, ṭang tura beisei theih loh te erawh an harsatna ngaihtuahpuiin, damdawi leh inenkawlna bakah an fate zirna thlenga buaipui sak an ni ang,” a ti.
Pu Lalsawta chuan, tuna kan thlai tharte hi ala tam loh avangin a hralh chhuahna lamah kan buai phah fo tih thu sawiin, “Special Economic Zone emaw Cluster Farming hmangin khaw tam takah thlai chin bik tur leh ran vulh bikna kan siam ang a, sorkarin an mamawh inṭawm leh mimal mamawh hrang hrangte awmze neiin a buaipui ang a, a market-a buai lo turin kan thar chhuah hi tihpun kan tum dawn a ni. Kan thar chhuah leh ran vulhte a lo tam hian a man a lo tlawm a, a thar chhuaktu pawhin an thar chhuah a tam tlat avangin an sum lakluh a lo tamin an lo hausa ve zel a. Sum veivak a tam chuan kan ram chu ei leh bar kawngah kan lo hausa dawn a ni,” a ti.
Sorkar hna a thawh lai leh Minister a nih laia sorkar hnathawkten Mr. Clean tia an hriat lar Lalsawta chuan, India ram State ṭhenkhata thil thleng mek kan hmuhin Mizoram chu chhan tlak a la nih thu sawiin, “Dik lo taka sum la luttu ten sum siam belh an duh avangin sorkara mi pawimawh, Minister leh MLA nih an rawn tum ṭan ta tlat mai. Hetiang mite hian sorkar hi sum siamna khawl ang lekah ngaiin MLA leh Minister an nih theih nan inthlan dawnah lei tumin an rawn bei dawn che u. In vote lei tumtute hian nangmahni zawk kha a ni lei an tum chu. Hetiang mite hi lo hnawl ula, lo ti zak rawh u. Sorkar pawisa kan tih hi mipui chhiah pek tling khawm a ni. Pencil kan lei pawhin sorkarah chhiah kan pe zel. Hmanni a Car thar man to tak an lei pawh kha mipui chhiah pek tling khawm hmanga an lei a ni. Kan chhiah pek tling khawm hmanga kan vote lei tum tute hi kan hnawl angai a ni,” tiin MLA Candidate-te ti hautak lo turin kalkhawm mipuite Lalsawta chuan a chah bawk a ni.
