MPCC chuan thuchhuah siamin, “June 28, 2022 khan Pu Tawnluia, Dy Chief Minister chuan Khawhai Town Hall-a Tuichang South Block MNF Conference a hmanpuinaah thu sawiin, chhungkaw sing 6 hnenah SEDP tanpuina Rs. 50,000/- zel pek a nih tur thu a sawi a, ‘July 2022 chhungin DC tin atangin pawisa an semchhuak thei tawh turah ka ngai,’ a ti a ni. Hei hian MNF Party chhungah leh thingtlang kuthnathawktu rethei tak takte rilruah beiseina sang tak a siamsak a, July thla chhung ngeia SEDP tanpuina Rs. 50,000/- dawn mai inbeisei chhungkaw sang tam tak an awm hman a ni.
“Amaherawhchu, July thla a liam a, vawiin August ni 2, 2022 thleng hian SEDP tanpuina dawngtu chhungkua sawi tur pakhatmah an la awm ta chuang lo a. Dy. CM Pu Tawnluia’n July thla chhunga pekchhuah hman a nih tur thu sawia Tuichang bial mipuite leh Mizoram mipuite beiseina sang tak a siamsak chu BEISEINA LEM mai a ni tih a chiang leh ta a ni.
“Kum 2018-a ZONET-in Inthlan thlirlawkna a buatsaih tum khan Pu Zoramthanga chuan SEDP cheng nuai 3 sem a harsat loh tur thu chiang takin a lo sawi tawh bawk a, “Kum 5 chhung, term khat project a ni a, kum tin Rs. 60,000/- a nia, thla tin Rs. 5000/- a ni mai a. MR hlawh pawh a zat lo a, thil harsa tur a ni lo,” a ti a. Mipuiin beiseina sang tak nen kan thlang tling ta reng a, mahse, kum 3 leh a chanve chuang an sorkar hnu pawha SEDP dawng chhungkaw pakhat pawh sawi tur an la awm lo hi hriatthiam theih a ni lo. Kum 2018-a MNF sorkar hnu hian Budget vawi 4 pharh a ni tawh a, hetiang hi SEDP atana sum dah dan a ni :
2019-2020 : 300 crore
2020-2021 : 513 crore
2021-2022 : 400 crore
2022-2023 : 700 crore
TOTAL : 1913 crore
“Budget kan en chuan kum 4 chhunga SEDP atana MNF sorkar sum dah hi a tam tawk viau a, cheng nuai hlirin nuai 1,91,300/- zet a ni. CM Pu Zoramthanga’n sem a harsat loh tur zia chiang takin a sawi a, Dy. CM PU Tawnluia’n July 2022 chhunga ngeia sem a nih tur thu a sawi bawk a. Tin, SEDP pawisa hi Budget-a dah sa vek a nih avangin an duh phawt chuan sem tur a awm ngei turah Congress Party chuan kan ngai bawk. Amaherawhchu, ram hruaitu lawk pahnihten hetiang taka chianga an sawi tawh chung pawha tun hun thlenga SEDP cheng khat pawh sem a la ni lo hi a mak takzet a, mipui zah lohna dik tak niah kan ngai. MNF leh SEDP hi beidawnna thlentu mai an ni tih a chiang chho zel a ni.
“Politician-te hian ram kan hruaina kawngah kan thutiam kan hlen tur a ni a, tih hlawhtlin leh theih si loh tur thu tiamin mipuiah beiseina kan siamsak tur a ni lo. Congress Party-in “Kan ti ang” kan tih tawh chu kan ti mai zel ang hian MNF Party pawhin In tina SEDP cheng nuai 3 sem an tiam hi tihlawhtling ngei rawh se. Pu Zoramthanga sawi angin SEDP hi kum 5 term a ni a, kum 5 chhunga kumtin Rs. 60000/- sem a cheng nuai 3 tling tur a ni. Hetiang khawpa chianga an sawi lawk vek chunga a sem zat tur leh a sem hun tur thlenga tunhnua an ti danglam sek pawh hi an rintlak loh zia tilang tu a ni.
“July thla a SEDP sem a nih tur thu chiang taka sawi a, MNF Party worker-te leh mipuite hnena beiseina sang tak pe a, ti hlawhtling leh si lo tu Pu Tawnluia, Dy. Chief Minister hian mipui hmaah thupha a chawi ngei turah kan ngai a. Thu pha a chawi duh lo a nih chuan an Party worker-te leh mipui zahna a nei miah loah kan ngai dawn a ni,” an ti.
