Vawiin August 1, 2025 Zirtawp hian Congress Bhavan-ah MPCC Political session neih a ni a. He hunah hian Lal Thanzara, President MPCC chuan chhungkaw hnih lawmluhna neiin thu a sawi bawk.
MPCC President chuan, “Kerala-ah rawngbawltu Nun 2 te chu BJP firfiakten dawtin kristiana inleh luih tir tum angin an puh bakah mihring ruk bo tum angin an puh a. Congress hruaitu KC Venugopal te, Saleng A Sangma leh Priyanka Gandhi ten kan kristianpui rawngbawltute tan an thlavang hauhin an au a. Hetih lai hian kan ram CM leh kan LS-MP leh RS-MP te pawh heng rawngbawltute thlavang hauh hian an au chhuak ve lo hi a vanduai thlak tak zet zet a. Ring lo mite zawkin an thlavang an hauh laia keini kan ngawi reng hi a pawi tak zet zet. Kei pawhin he thil thkeng hi vanduaithlak ka ti a, ka demin, Nun pahnihte hi chhuah turin ka ngen a ni.
“Kan CM hlui Pu Lal Thanhawla kha rawngbawlna lamah a chek thuk tak thu kan hre lo, mahse, Kristian te tawrhna a thlen hian rawngbawltute thlavang hauhin a au chhuak thin a. President leh PM hnenah te lehkha ziakin hma a lo la tawh thin, India rama kan kristian puiten Pu Hawla kha an thlamuanpui hle thin a. Hotu leh nihna kan chan hi tun tak hi kan sakhua kan humhalh a, chhan an ngaih huna kan chhan hun tak tur chu a ni dawn lawm ni?
“BJP hi an sual ngawr ngawr pawh a ni hran lo, an talhfiak RSS, Sangh Parivar, Bajrang Dal te hi missionary te tan an tawrhhlelhawm em em mai a ni. Kan missionary ten missionary pawh inti ngamlo khawpin hun an hmang mek a. Hetiang karah pawh ringtu zaa za a inchhal ram hi kan harhchhuak lo a nih chuan kan chan tur chu ngaihtuahawm tak a ni.
“BJP President thar, Dr. K. Beichhua pawh kohhran upa a ni a, hetiang hunah hian an ngawi leh ta hlauh si a. An lalna te leh hun tha an neih laia an au chhuah hi a tul tak zet zet a ni. Hotu leh nihna kan chante hi tun hun tak hi a ni lawm ni kan sakhua kan humhalh a, kan rawngbawltute kan chhan hun tur ni. Kan politics khelhnaah pawh hian ka sawi nawn leh duh thin chu kan ram, kan hnam, kan sakhua a him em? Kan party awmnaah hian a him em tih kan ngaihtuah a ngai.
“Vawiinah hian kan Enchhin Sorkar mek hian BJP president Pu Beichhua hi Dy. CM ah I dah ang u han ti se chuan BJP sorkar lei malsawmna tam tak kan dawn phah ngei ngei ang. Mahse, chu chu an tihduhloh chhung chu kan ram hi sum leh paiah hrekin kan awm dawn niin ka hria, a vanduaithlak takzet a ni.
“Fing thar thut se la, Pu Beichhua hi Dy. CM ah dah thut se la, lei malsawmna chu kan dawng ngei ang. Mahse, kohhran miten thlarau malsawmna kan dawng ang em tih erawh chu kan ngaihtuah ngun a ngai hle dawn a ni.
“Heng karah hian Mizo mipuite kan ding mek a, hetiang karah hian term khat Enchhin sorkar hian min sorkar pui chuan development leh thlarau khawvelah hian khawi ram nge min thlenpui ang tih hi kan ngaihtuah a hun tawh takzet zet a ni.
“Chuvangin, engtiklai maha BJP sorkar sum hmang ve duh lo tur Congress party, sakhaw zalenna humhim duhtu hi India ramah leh Mizoramah hian a sorkar a ngai a ni.
“Mi tam tak he Enchhin sorkar-ah hian an beidawng mek a. Tun dinhmun an thlen hma hian tuna an hotupa hian ‘kan chuanna motor hian kan tumram min thlenpui loh chuan kan zuanthlaksan mai ang’ a ti a ni. Vawiin ni ah hian ZPM atang te, an Minister leh MLA atang te, an hnathawktute atang hian an chuanna motor hian campaign laia an tumram a thlenpui dawn lo niin an hria a, an hotupa hnenah kan zuangthla mai dawn em ni an han ti a. Ani chuan zuangthla lo e, kan tumram kan thlak thleng mai ang a ti ni. Chutiang chu vawiina kan inhruai dan ni a, a vanduaithlak hle a ni.
“Chutiang inhruai dan duh lova kan party ah beiseina leh rinna neia min lo zawm thar kan nei hi a lawmawm takzet zet a, ringtu, Kristian sakhaw mi a nihna ah an tihsual ka ring lo,” a ti.
Friday Political Session hi Lalfelkima, Gen. Secy. MPCC chuan a kaihruai a. H. Lallawmsanga President BCC, Aizawl South-I in report a pe a. LC Tluanga’n thusawina a nei bawk.
