Vawiin ni 5.5.2025 (Thawhtanni) khan MPCC President Lal Thanzara chuan Khawlian Community Hall-ah Congress zawm thar mi 122 (MNF – 36, ZPM – 69, HPC – 1, Neutral – 9) a lawm luh bakah Phullen leh Phuaibuang khuaa Party hruaitute a kawm bawk.
Lal Thanzara President MPCC chuan, “Politics hi Pathianin ram rawngbawlna atana min pek a ni a, Kohhran hi kan thlarau lam nun min enkawl tura min pek a ni. Hei hian Politics hi Pathian rawngbawlna tih a chiang hle. Roreltute pawh Pathian ruat an ni a, ni tha lova roreltute pawh Pathian ruat an ni,” a ti.
“ZPM hian an intiam angin Sawhthing an lei lova, Hmunphiah pawh an lei lo. An hlawhchham. Politics hi lal duh avanga midang tih beidawnna tur intiamna tur hmun a ni lo. Bible in a huat zinga a sawi chu lei daw-thei te a ni. Kan sorkar hrawn mek hnuaiah kuthnathawktute lungngaiin an rum mek a. Sorkarin thlai rate a ti chhia a, vaiho kutah loh theih lohna vangin pawisa tlemte in an hralh mek a, a lungchhiat thlak hle a ni, tih sawiin Pu Lal Thanzara chuan, Congress chuan Pathian leh mipuite zarah ram mipuite tana kan au hla zawng zawng kan tihlawhtling vek a, Congress party intiamna NLUP in Mizoram mipui dinhmun a tha zawngin a her danglam a ni,” MPCC President chuan a ti.
Lal Thanzara chuan, “MNF in intiamna an nei a, an sorkar a, tute hnenah mah an au hla, tanpuina an tih sak hriattur an awm lo. MNF sorkar kal taah khan Hnam Sipaite aiin Kamrula a lar zawk.
“Kristian sakhua dodaltu BJP mawngzawmtu MNF leh ZPM hnuaiah Mizoramin chunglam malsawmna beisei ngam chi a lo a, inthlan dawna hausa thut party leh Kristian sakhua dodala nuai chimih tumtu BJP mawmgzawmtu MNF leh ZPM hnuaiah Mizoramin chunglam malsawmna beisei ngam chi a lo.
“Enchhin sorkar chu BJP laka an intiamna an tihhlawhtlin ngam leh si loh avangin BJP chuan Mizoram enchhin sorkar a hrek mek a, Mizoramin sum harsatna namenlo kan tawk mek a. A theih leh a rem dan danin mipui dahkhamin sorkar chu pawisa pukin an hmanhlel mek a ni.
“Aizawl khawpuia mipui ti ti ber chu Congress Party a sorkar leh ring an tam ber tawh. Hei hi ZPM sorkara ruling bial leh Assembly Speaker bial meuha ZPM mi leh sa heti zatin Congress an rawn zawm hian ZPM an sorkar nawn leh an ring lo mai ni lovin, an term pawh an hman zawh theih ring lo an tam ber tawh tih hi a rawn nemnghet a, ram rawngbawla sorkar turin Congress Party a chhem alh zual a. NLUP changtlung zawk hmangin Mizoram mipuite tan hna kan thawk leh dawn a ni,” a ti bawk.
