Vawiin April 29, 2022 hian Congress Bhavan, Aizawlah MPCC Friday Political Session neih a ni a. Political session hi Pu C. Dothansanga, Gen. Secretary-in a kaihruai a, Pu Lalsawta, President MPCC-in thu a sawi bakah All India Professional Congress (AIPC) President Dr. Henry Zodinliana Pachuau-in ‘Aizawl khawpui than dan : Khawtlang eizawnna leh ram inrelbawlna a nghawng dan leh hmalak theih dante’ tih thupui hmangin Presentation hun a hmang a, report hrang hrang ngaihthlak a ni bawk.
He huna thusawitu Pu Lalsawta chuan Healthcare bill tang tam lutuk avanga Mizoram mipuiin harsatna kan tawk chu pawi a tih thu a sawi a, “Healthcare rinrawla hmangtu mi rethei tam takte mangang au rawl hi kan hre vekin ka ring. Mizoramah hian kan ngaihtuah phak baka retheite pawh an awm a, heng mi rethei zawkte leh rethei vak lo a kan ngaihte pawh hi an dam loh chuan inenkawlna a hautak thin em avangin an buai thin hle a. An neih ang ang hralh pawh mi tam tak an awm a ni. Pu Lal Thanzara’n Healthcare a enkawl lai, Congress sorkar lai kha chuan mi rethei zawkte pawhin Healthcare kha a takin an chhawr tangkai a, bill tang a awm ve ngai lo. Tunah chuan thla 3 dan zelah Finance Department-in Healthcare atan cheng nuai 400 an pechhuak thin a. Chuti chung chuan bill tang a tam em em a, mipui mangang au rawl hi a ring tawh hle a ni. Healthcare chungchangah hian Mizoram mipuite hi chhanchhuah kan ngai a, chhanchhuak turin Congress kan sorkar leh a ngai a ni. Tunah hian healthcare Corpus Fund pungte, central atanga healthcare atana lo kalte, state fund atanga an dah zawng zawngte awm ve bawk mah se, hei hian mipui mamawh a phuhruk zo lo a, vaibelchhe tam tak leiba a tlingkhawm ta a ni. Congress kan sorkar leh a nih chuan he harsatna hi kan nuaibo ang a, kan sorkar hmasaka kan tih ang bawk khan a hun takah bill hi kan pe leh ang,” a ti.
Party induhsakna chungchang sawiin, “Party a chhiat ber lai pawha rinawm taka awm tlat kan mi leh sate hi chu kan phu ang tawk leh ram tana pawi khawp ni lo thilah chuan kan induhsak ve ang. Chutiang tihna chang hre lo hruaitu chu kan neih pawh ka ring lo hrim hrim. Amaherawhchu, ram hmasawnna hnathawh ti thuanawp thak khawpa induhsak hi chu kan tum lo. Party induhsakna avanga Tuirial Hydel Project pamtul thak te, party mite induhsak tum luat avanga Falkawn Referral Hospital pamtul thak angte kha thlen tir kan tum lo. Keini chuan mimal aiin ram hi kan dah hmasa dawn. Mipui zawng zawng tana thawk tur sorkar kan din dawn a, chutah chuan mitin tan hamthatna a awm vek dawn a ni,” a ti.
