MPCC party President Lalsawta chuan vawiin khan a office, Congress Bhavan-ah chanchinthar lakhawmtute a kawm a. “Kum 2023 Inthlan hi Mizoram tân hian a pawimawh dawn êm avângin hê inthlan lo awm tûra inthlan leh a kaihhnawiha sum sêng tlêm tûrin Politician te leh ram mipui te ka ngên a ni,” a ti.
Lalsawta chuan, “Congress Party-ah chuan kan inhrilh fo tawh a, Congress Party mipui te pawh kum khat chhûng chauh hi lo insum tûr leh kan Candidate te phurrit siamsak lo tûrin ka ngên tawh a. Inthlan kaihhnawiha Sum leh Therhlo laka kan fihlîm theih chuan kan ram chhiat zêlna tûr kan dang lêt dawn a, hei hi Election Commission of India (EIC) leh Mizoram People Forum (MPF) duh dân pawh a ni. Sorkar thianghlim, tha, chak leh hnathawk thei siam nân hê inthlan lo awm tur hi a tha zawnga ramin a bul a tanna a ni ang.
“Sorkar sum enkawl chungchangah hian leiba a pungin ram ro hlû kan siam theihna tûr tam takah Central Sorkara Ministry leh Department tam tak te hna thawhna tûra State Matching Share (SMS) pawh kan pe hlei thei lo va, Sum enkawl kawngah hian Sorkar hi a hlawhchham niin ka hria. Planning Commission awm tâk loh hnûa Central Sorkar leh States/UTs te inkara Financial Transaction kal dân hriat fuh loh vâng niin ka hria. Kum tam tak Planning Commission kha PLAN sum bawm a ni thin a, a awm tâk loh hnû hian kawng hrang hranga ram hmasâwnna tûr hi Central-a Ministry leh Department te Programmes leh Schemes mila thawk thei tûra SMS leh hnathawh tur tha leh fel fai Detailed Project Reports (DPR) neih hi a pawimawh tâ a ni.
“Ram tâna pawimawh ber fo chu Good Governance (ram leh mipui enkawlna tha), dânin ro a rêlna hi a ni. Vawiinah hian ram mipuiin Sorkar ring zo lovin anmahni kutah ram rorêlna an kengkawh tan tâ emaw tih theih hial a ni ta a. SORKAR NEI LO ang hiala kan ram a awm ta mai hi a pawi tak zet a, diknaa rorêl tûr Sorkar kan mamawh a ni.,” a ti.
“Covid-19-in kum hnih zet min hrual beh hnúa zalên taka Krismas leh Kum Thar kan hmang thei tûr bi a lawmawm êm êm a, blim leh nuam taka hmang túrin Mizoram mipui te duhsakna ka hlân e,” a ti bawk.
