Vawiin khan MPCC president Lalsawta, chuan Aizawl Press Club ah Press Conference neiin, “Congress Sorkar lai khan Sorkar hnathawkte duhsakin an hlawh chungchangah 6th Pay Commission Recommendation kha ‘adapt’ mai lovin a nihna ang angin kan pawm a. (Notification dtd. 15.3.2013) Kum khata vawi 2 an Dearness Allowance (DA), pung pawh ni 16.8.2018-a Notification kan chhuah angin Sorkar remchan dan angin kan pe a. (Central Sorkarin ni 1.7.2022-a 38 % a pék lain keini’n 1.3.2022-ah 28 % kan pe a.) Pathian leh Mizoram mipui zara kan Sorkar chuan hei hi kan chhunzaawm ang. Kum tam tak kan lo hman tawh, Old Pension Scheme hi Rajasthan, Himachal Pradesh, Chhatishgarh Ieh Jharkhand State te angin keini pawhin Old Pension Scheme bawk kha hman leh kan tum a ni. Hlawh leh Pension leh GP Fund te hi Sorkar hnathawkte’n a hun takah an hmu thei ang. Supreme Court phei chuan a huna pêk an nih loh chuan a Interest nen an pe tur ani, a ti hial a ni. Penssioner te tan pawh Dearness Pay (DP) hi a hun takah kan pe anga, sorkar hnathawkte hlawh pawh a hun takah kan pe bawk ang. Sorkar hnathawkte hlawh leh a dangte hi a hlawkpuitute chu sumdawngte, mipal nawlpui leh Kohhran thlengin kan ni,” a ti.
Lalsawta chuan, “Ministry remruatna hnuaia a taka Sorkar mawhphurhna hlen chhuaktu chu Sorkar hnathawkte an ni. Sorkar hnathawk ve lo, lo neitu leh kuthnathawkte tana thik tham hiala dinhmun thaa ngaih, Regular-a thawk mékte leh Provisional Employees zawng zawngte hi tangkai zawka hman dan ngaihtuah a, an dinhmun (Conditions of Service) hi ennawn a, Manpower Policy leh Manpower Management mumal tak siam kan duh a ni. Anni hi kan ram ro hlu (Assets) ni leh zual tur leh kan ram leh a mipuite (kan Assets te) hi ram rohlu-a din chhuak tura kan hmanrua te an ni.
” Sorkar leiba a tam ém avang hian Sorkar lo piang leh tur tan rulh ngai tur a tam dawn hle mai. Hei hi Sorkar sum (Mipui sum) a nih angin dik taka hman loh vang leh Planning Commission awm tak loh hnua India ram sum enkawl dan danglam ta hriat fuh lohleh vang niin ka hria. Sorkar sum hi mimal sum enkawl anga enkawl theih a ni,” a ti a.
MPCC president chuan, “Party thenkhatte’n kumin Inthlan hi an sum ringa chak theih an inring a. Keini Congress Party erawh chuan Inthlan hma thla 10 vél chauh awmah hian kan ram mipui te’n Candidate te sum an hnawl ngam chuan kan ramah rorélna tha nei túrin a bul kan tanah kan ngai a ni. Chuvangin, Mizoram mipui leh a bikin, Congress Party mite chu he thla 10 chhung chauh hi lo sum a, kan Candidate te phurit siamsak lova, sum hman loh theih lohnaah pawh kan Block leh Unit zawng zawng te’n lo inhuam turin leh a tul anga lo luang chhuak zawk turin kan inngen a ni. Ram rorelna tha nei túrin kan pek ve a ngai a, hei hi chu Mizoram mipui hian kan huam ve tur a ni,” a ti bawk.
Press Conference-ah hian Pu Lalsawta, President, MPCC chuan Lunglei Municipal Council inthlan lo awm tur behchhana bial lo vil turin heng mite ruat an nih thu a puang bawk :
1. Lunglei West : PC Lalthanliana
2. Lunglei South : Dr. RK. Lallianthanga
3. Lunglei East : Joseph Lalhimpuia
