Thawhlehni khan MPCC President Lalsawta chuan, Ratu khuaa Primary Agricultural Credit Societies (PACS) zir chiangin hun a hmang a, an kalphung chi hrang hrang leh ram tana rotling leh ram economy siamthatna atan leh a bik takin kuthnathawktute chawikanna tur atan PACS hi a hman tlak rêng em tihte a hmunah kalchilhin a zir chiang a ni.
Lalsawta chuan, “Kan ram economy siam tha turin kan ngaihtuahna kan seng nasa hle a. Tunah pawh kan ram economy bul tanna atana pawimawh tak a nih beiseiin PACS hi kan zir chiang a ni” a ti a. “Kuthnathawktute chawi chhuah hi kan thil tum pawimawh tak a ni a. Miretheite chawi chhuahna atana thil pawimawh hmasa nia kan hriat apiangah kan kal nghal dawn a. Chutiang chuan, PACS pawh hi kuthnathawktute chawi chhuahna atana thil pawimawh a ni tih kan hria a. Pathian leh mipuite zara kan sorkar a nih chuan tun aia tha zawk leh changtlung zawkin PACS hi kalpui kan tum dawn a ni,” a ti bawk.
Ratu LAMPS (PACS) hnuaiah hian Account neitu mi 1,111 lai mai awmin Share Holder hi mi 411 in an nei a. NABARD in Motor leh Aieng herna tur khawl pein, electric pawhna atana sum senso a hautak deuh avangin tunah Aieng herna khawl hi an la hmang thei lova. Aieng herna tura thil tul dang zawng zawng erawh tih fel vek tawh a ni thung.
PACS hi tun dinhmunah India rama Bank dang nen la inthlunzawm lo mahse Central sorkar hmalakna in All India a Bank dangte nena in link tura hmalak mek a ni. PACS hnuaia Account neitute pawisa pek tling khawmin loan pek chhuah thin niin, motor loan te pawh Ratu PACS hnuai atanga pek chhuah a ni tawh a ni. Kuthnathawktuten loan an lak dawnin LSC dahkham tir an nih bakah mi thenkhatte erawh VC pass hmanga loan pek chhuah pawh an awm bawk a ni.
Ratu LAMPS (PACS) hi kum 2013 a din niin Joint Liabilities Group (JLB) hnuaiah Central sorkar hnuai atangin kuthnathawktute tan loan an pe chhuak tawh a. Agriculture hnuaia loan interest hi 12% a nih bakah Self Help Group tan interest rate hi 10% niin mimal mamawhna ang chi-ah interest 15% in loan an pe chhuak thin bawk a ni.
