“Pu Ṭhena Policy tihhlawhtlin a nih theih nan Congress Party a lut turin Pu Ṭhena Policy tuipuitute leh PC Party te ka sawm a ni” – Meriam L. Hrangchal
Vawiin, July 12, 2023 hian South Tuipui Block Conference, Hnahthial Bazar a neihah, MPCC Treasurer Dr. Lalmalsawma Nghaka chuan party hrang hrang leh neutral aṭangin mithar duhawm tak tak mi 324 Congress party-ah a lawmlut.
He hun hmanpuitu Pu Lalnunmawia Chuaungo IAS (Rtd) chuan thusawiin, India ram zalenna sual chhuaktu leh Sakhaw tlem zawkte leh hnam tlem zawkte himna tura India Danpui duang chhuaktu chu Congress Party a ni a. BJP te hian Uniform Civil Code (UCC) min hmanpui an tum mek a. Hei hi Congress Party, Kristiante leh Sakhaw tlem zawk ten nasa takin kan dodal mek a ni. CAA pawh nasa taka kan do laiin MNF te chuan an vote pui mai. UCC pawh MNF te hian an dodal leh ngam chuang lovang tih hi ka hlauh ber a ni, a ti.
Mizoram Chief Secretary kal chhuak ta, Pu Lalnunmawia Chuaungo chuan Mizoram-ah party lian pathum kan awm mek a. Sorkar pawh kan inring tlang vek a. Nimahsela, sakhaw humhimtu, hnam tenau zawkte chhawm dawl ṭhintu chu Congress Party kan nih laiin Party dang pahnihte hi chu Sorkar mahse Central lama Hindutva tuipuitu BJP zawmtu turte an ni, a ti.
Pu Vanneihthanga Vanchhawng pawhin Congress Party a zawm chhan sawiin, ZPM ni turah mi tam takin min ngaih laiin Congress lamah ka lut a. Kan ram leh hnam damna tura ka ngaih leh ka tuipui em em reform agenda hi ZPM a an hotupa pakhat kan pe a. Nimahsela, tuifinriata thlak ang vang vang a ni a. Congress Party hruaitute kan pe leh a, min lo tuipui em em a, hei hi kan ram leh hnam damna tur a ni tiin a zir chianna te min neih sak a. Hei hi a tuipui tute in ni a, nangni hovin kan ti hlawhtling dawn lawm ni, a tih tak avangin kan ram leh hnam siam ṭhatna tur a nih si avangin Congress Party ah kan lut ta a ni, a ti.
Pu Vanneihthanga Vanchhawng chuan, Sakhaw hmun pawimawh intih bawrhban sak a, intih chhiat sak hi Breaking News a tling. Kan ṭhenawm State lawkah buaina nasa tak awmin, Kristian Biak In tam tak hal a ni a. Kristian Chief Minister, Mizoram CM hian Kristiante thlavang a hauhna ṭawngkam vawikhat pawh ala chhak chhuak lova. Kan unaute thlavang a hauh duh lova, a ngawih rengna chhan hi NEDA hnuaiah BJP an zawm vang a ni a. 2018 MLA election dawnah party pakhat chuan BJP hnen aṭangin pawisa tam tham tak an dawng a nih kha. ZPM Leader hi June ni 27, 2023 khan zan khat riakin Guwahati-ah a zin a, engti turin nge a zin tih hi kan zawh chhuah a ṭul a ti.
Pi Meriam L. Hrangchal pawhin thusawiin, eizawnna pangngai tak ka nei a. Ka tan politics-a sum leh pai zawn buai hi a ngai lo. Pathian zarah ka sumdawnnaah kan chhungkaw eikhawp chu kan la thawk chhuak ve thei. Nimahsela, kan ram, kan hnam, kan sakhua hi chhan a ngai nia ka hriat avanga politics-a rawn zuang lut ka ni. BJP te hian kan ram an ti chhe mek a. Kan hnam, kan sakhua min nekchep tumin hma an la mek a. India ram hi Hindu Lal rama siam an tum a ni. Chuvangin, theihtawp chhuaha BJP do turin Congress Party-ah lut ta ka ni, a ti.
Vestige enkawltu Pi Meriam L. Hrangchal chuan, Ka pa, Lalhmingthanga khan Pu Ṭhenphunga policy kha a tuipui em em a, kei ngei pawhin ka tuipui a ni. Pu Ṭhenphunga policy ti hlawhtling turin Congress Party ah ka lut a, Pu Ṭhenphunga Policy tuipuitu leh PC Party zawng zawngte pawh Pu Ṭhenphunga Policy tih hlawhtlina a awm theihna tur atana Congress Party a rawn lut vek turin ka sawm che u, a ni, a ti bawk.
