Vawiin 24-07-2025 Ningani hian Dr. Lalmalsawma Nghaka, Treasurer, MPCC chuan Mizoram chak lakluhna ber NH-306 kawng chhia chu a hmunah a tlawh.
NH-306 kawngpui chhia en thlithlaia kal Dr. Lalmalsawma Nghaka chuan, “Mizoram mipuiten kan chak lak luhna pui ber NH-306 hi sawrkarin a hlamchhiah rei lutuk avangin furpuiah mipuiin harsatna namen lo kan tawk chho zel a, a vanduai thlak hle a ni.
“He National Highway-ah hian ni tam tak chhung chu bungraw phur motor an tangkhang tawh a, lirthei neitute leh lirtheia eizawngte an khawngaihthlak tawh hle. Bungraw chah luttu sumdawngte pawisa a tang nasa hle a, an mangang tawh hle a ni. Nitin mamawh thil hrang hrang a vang ta hle a, mipui nawlpuite tan harsatna nasa tak a thleng mek a ni.
“Opposition party hrang hrang te, Joint Civil Society of Mizoram te leh tlawmngai pawl dangte pawhin mipuite tan nasa takin thawm an nei mek a, Mizoram Tripper Association leh lirtheia eizawng pawl dangte’n hnatlanga thawk chhuakin, ‘A tlan tawk tawk theih nan’ tiin kawng an thawm tha ta hial a ni.
“Nikum September 1, 2024 atang khan Mizoram sawrkarin kawng tha zawk kan neih nan tiin petrol leh diesel atanga chhiah Rs. 2/litre a la a. He Road Maintenance cess, mipuite min barhluih chhiah atang hian vaibelchhe tel tak meuh meuh sawrkar sum zema lut kha enga tan nge an hman tih zawhna a lian ta hle a. Kawng tha zawk kan neih theih nana Sawrkarin mipuite ip atanga sum min pawh pen sak hi kawng siamthatna atana an ti tak tak a nih chuan a hmanna tur dik taka hman nise a tha hle ang.
“He kawng pawimawh tak hi Mizoram Sawkarin September 2024 khan a siamtu Satguru hnen atangin a laksak a. Mizoram sawrkar fawng vuantute hian he kawng pawimawh tak hi veiin ti tak tak se, thla kalta hun eng emaw zat chhung khan an siamtha hman vek a ni.
“Mahse, chutianga ti ta lovin, mawhpuh tur leh chhuanlam tur zawng reng rengin an phe ta ruai zawk a. Mizoram Sawrkar mawhphurhna a ni tih hre reng chungin kan hotu lu te’n tu mawhphurhna ber nge a ni tih hriat harsa khawpin an sawi kual vel mai mai a nih kha!
“He kawngpui hi Mizoram Sawrkar mawhphurhna a nihzia tichiang turin July ni 7, 2025 khan Mizoram Sawrkar (MPWD)-in NH-306 (Km 118) Kawnpui to (Km 133) New Khamrang kawng chu NHIDCL hnenah a hlan leh ta si a, NHIDCL tan pawh furpui laiin hma a lak ve theih ta chauh a ni.
“Nikum lama kawng an black top, Vairengte atanga Khamrang kawng pawh a khawk leh deuh vek tawk a. Hengte pawh hi a pawimawhna hria a, uluk zawk leh changtlung zawka thawm tha zel turin sawrkar hi kan fuih bawk a ni.
“Kan sawrkar hian a mawhphurna hi la ngamin, pawm ngam tawh se la, midang mawhpuh tawh lovin a tih tur dik tak hi hlen chhuak ngei turin Sawrkar hi kan phut tak zet zet a. ZPM Party hi sawrkar fawng vuan mektu an ni tih hrilh nawn fo ngai tqwh suh se.
“Mizoram hian rilru puitling pu, mawhphurna hlen ngam Sawrkar a mamawh a. Sawiselna karah pawh insawifiahna tur zawng ruai reng lo a, a tih tur chu ‘Saipui kal lai anga kal miah miah ngam sawkar’ kan mamawh tih a lang chiang ta hle a ni.” tiin a sawi.
MPCC Treasurer, Dr. Lalmalsawma Nghaka hi Congress hruaituten an tawiawm a ni.
