Ni 24th, April chhun dar 2 atang khan Mission Veng Feeder Current fel lohna a awm avangin Mission Veng Feeder in a chawm Mission Veng, Model Veng, Kulikawn, Thakthing, Dam Veng te’n eng an nei thei lova. Local Council leh P&E Dept hnathawktute pawn theihtawp chhuahin ngawrh takin a siam that hna an thawk a ni. Ni 25th April, 2025 Dar 9:00 leh chanve bawr vel khan Mission Veng feeder chawm Thakthing leh Dam Veng lam te current pek luh theih a ni a. Kulikawn lam hi siam fel a la ni thei lo thung a ni.
Dr Lalmalsawma Nghaka, Treasurer, MPCC chuan P&E Dept a hnathawktuten line tha lo an siamna hmunah tlawhin, overtime tak meuh meuh a mipuiin êng kan neih theih nana hna an thawh avangin an chungah lawmthu a sawi bakah an ei leh in (Refreshment) a tum sak a. Furpui hmaa line enfel ngai te pawh en fel lâwk a, mamawh hunlaia êng an neih theihna tura hmala turin P&E hotute a ngen bawk a ni.
Dr. Lalmalsawma Nghaka, Treasurer MPCC chuan Power Minister Pu F Rodingliana pawh biain an bial chhung harsatna a thlen a, êng (Current) lama harsatna an tawh avanga Damdawi In ten a bik taka harsat an tawh nasat zualzia te a thlen a ni. P&E Minister hi official duty a Shimla-a a awm lai mek a nih avangin a enkawl Department te lo hrilh turin Pu Mala chuan a ngen a ni.
Pu Mala chuan Mission Veng Feeder in a chawm area leh veng hi a zau êm avangin Feeder-ah harsatna a awmin a tuartu veng an tam thin hle a. Veng a thang zel a, mihring lo pung zelin, in thar ding a awm belh zel bawk a, chuvang chuan Aizawl khawchhungah hmathar lak a pawimawh hle a, a bik takin Mission Veng Feeder hi then hran (split) dan ngaihtuah ran a pawimawh hle a ni, a ti bawk.
